– Me må fylgja opp frivillige lag med pengar
Frivillige lag må ikkje verta sitjande med tynn lommebok og fyldig ansvar for integrering av flyktningar, meiner politikarane.
Heradsstyret opna tysdag døra for i alt 95 flyktningar i år, ein auke på 80 frå tidlegare vedtak. Dei nye kan koma frå Ukraina eller andre nasjonar.
Nettbasert «dugnad»
Jostein Moldsvor (KrF) tok til orde for å be rådmannen kalla inn frivillige lag til ein idédugnad der dei kan drøfta korleis flyktningane kan integrerast godt.
Leiar for samfunn, kultur og næring, Jon Nedkvitne, påpeika at heradet har tett kontakt med Nav og Grannehjelpa om saka. Planen er å gjennomføra ei nettbasert spørjegransking retta mot frivillige enkeltpersonar og lag. Temaet er kva dei ynskjer å bidra med. Saka skal drøftast i eit nytt møte med Grannehjelpa fredag. Tanken er at frivilligsentralen skal verta eit nav i det frivillige arbeidet.
– Det er viktig at flyktningane vert integrerte fort, og me veit at mange ynskjer å bidra, sa Nedkvitne.
Om det vert ein fysisk idédugnad i tillegg til nettgranskinga, er ikkje bestemt enno.
– Må fylgja opp
Stig Aase (Sp) spurde om det er ein plan for å støtta dei frivillige laga i arbeidet dei skal gjera. Det er ikkje sett av pengar til dei, så det må ein eventuelt koma attende til, opplyste Nedkvitne.
Varaordførar Frode Nygård (Frp) slo fast at flyktningsituasjonen er uoversiktleg og at det kjem informasjon som peikar i ulike retningar. Mykje har ikkje kommunen kontroll på, og eit stort ansvar vert lagt på Grannehjelpa, påpeika han
– Det ansvaret må me vera villige til å fylgja opp. Grannehjelpa har avgrensa administrative ressursar. I ein slik situasjon som dette må me vera ganske «på» politisk og fylgja opp behov som måtte dukka opp med ressursar, sa Nygård.
Kari Mostad (MDG) viste til at heradsstyret i same møte sette av éin million kroner til straumtrøyst og drift av gamle bygg som frivillige lag eig. Ein bør også fylgja opp med pengar til aktivitet, meiner ho. Heradet, Grannehjelpa og fleire bør elles arbeida saman om integreringa for å fordela ansvaret, understreka Mostad.
Skrik og hekk
Fleire folkevalde oppmoda kvemmingane om å ta personleg ansvar og ta godt imot flyktningane. Stig Aase (Sp), til dømes, meiner at mottaket vert syretesten som vil røpa om den nyleg vedtekne integreringsplanen er god nok.
– Formalitetane trur me er på plass. Ungane vil koma tidleg i skule og barnehage. Og så er me avhengige av at foreldra har ei form for aktivitet og sysselsetjing ganske fort. Mykje av det ligg på Grannehjelpa og andre frivillige lag, og på oss som enkeltpersonar i det å vera eit medmenneske. Me likar i Noreg å tru at me er eit fritt og godlynt folkeslag. Me har Skrik som nasjonalmåleri, og det fyrste me gjer når me kjøper hus, er å planta tujahekk rundt det, så ikkje nokon skal sjå kva me held på med. Så her må kvar og ein gå litt i seg sjølv, sa Aase.
Vigdis J. Håland (Ap) rosa administrasjonen for den positive haldninga han viser i saka. Ho reknar med at andre oppgåver må leggjast til sides ei tid når flyktningane strøymer til.
– Med god vilje trur eg dette vil gå bra. Så må kvar enkelt frå kvar vår tue, anten me er representant for ein arbeidsplass, medlem i ein organisasjon eller del av eit nabolag, ta imot flyktningane på ein god måte, formana ho.
