– Me lever av den støtta me får

I staden for å gje jolegåve til dei tilsette har Sparebanken Vest dei siste åra delt ut ei pengegåve til prosjekt i kommunen. I år vart hjelpekorpset i Norheimsund den heldige mottakaren.

– Fint å verta verdsett

Ingeborg Steine Jensen, leiar i Norheimsund Røde Kors Hjelpekorps, er svært takksam for gåva. Ho fortel at pengane har mykje å seia for korpset.

– Me lever av den støtta me får, seier Jensen.

Dei frivillige i hjelpekorpset får ikkje stønad for å delta på aksjonar. Det er skilnaden dei utgjer i samfunnet og opplevinga av å verta verdsett som held motivasjonen i gruppa oppe, fortel leiaren.

Pengane vil spela ei viktig rolle for utviklinga av hjelpekorpset. Ifylgje Jensen skal noko av pengane nyttast til kompetanseheving og kursing. Resten vil gå til innkjøp av nytt utstyr. Mellom anna vassrednings- og skredutstyr, varmesøkjande kikkert og turrdrakter står på ynskelista. Behovet for nye turrdrakter vart tydeleg i haust då det vart oppdaga at fleire av dei hadde hòl.

– Det er ein fridom å ha pengar å bruka til kjøpa inn meir utstyr, seier Jensen.

Ho understrekar at investeringane ikkje berre skal gagna gjengen i hjelpekorpset.

– Det me kjøper inn, vil me dela med til dømes politi og brannvern, seier ho.

Kronerulling

Lars Audun Torvik, banksjef i Sparebanken Vest i Norheimsund, overrekte pengane saman med kundekonsulent Astrid Sundfjord. Han skryter av jobben hjelpekorpset gjer.

– Dei gjer ein fantastisk jobb. Det gjev ein tryggleik å vita at me har dei kring oss, seier Torvik.

I tillegg til pengegåva frå banken har hjelpekorpset fått inn om lag 175.000 kroner gjennom ei kronerulling på nettsida Spleis. Den digitale innsamlingsaksjonen vart laga til i samband med leiteaksjonen i Tokagjelet og Norheimsund i haust, då tre personar omkom i ei båtulukke.

Det vart i tillegg samla inn 144.500 kroner i samband med gravferdene, der pengane vart likt fordelte på alle dei 22 ulike aktørane som deltok i søket.