— Me kan aldri vera førebudde

— Me søkjer med båt på Movatnet måndag. Elles vurderer me situasjonen utover veka, seier Ingeborg Steine Jensen, leiar for hjelpekorpset i Norheimsund.

Det er overflate- og strandsøk som vert gjennomført frå båten, og to personar er med. Av utstyr har dei ein kikkert som kan brukast i vatnet. Vatnet har vore grumsete, og det gjer det vanskeleg å sjå, men mannskapet fann ein person midt på dagen sundag.

Innstilt på det verste

Å leita etter hardt skadde eller omkomne er ei påkjenning, og det er vanskeleg å tenkja seg til korleis ein reagerer eller kva ein sit igjen med i ettertid. Jensen trur ein aldri kan vera førebudd på kva ein finn.

— Kor trena er de?

— Alle har søk- og redningskurs. Elles lyt me berre prøva å innstilla oss på det verste, men eg trur ikkje nokon kan klara å førebu seg på slikt.

Etter tøffe opplevingar legg lokallaget stor vekt på debrifing og samtalar. Torsdag denne veka skal alle treffast for å prata om hendinga i Tokagjelet og om rednings- og leiteaksjonen.

— Og så er me flinke til å ringja til kvarandre og prata om ting, fortel ho.

— Travelt

Lokallagsleiaren tippar at det i samband med aksjonen har vore rundt tretti personar i sving frå lokallaget. Fleire har vore med heile veka. Jensen har klart å kombinera aksjon og arbeid på ein grei måte.

— Det har vore veldig travelt og har vorte nokre timar vekke frå jobb, men eg har klart å kombinera det delvis, seier Jensen.

For pengar må tenast, og det gjeld også for hjelpekorpset. Far til leiaren, John Audun Jensen, seier til Bergensavisen at han har beundra Norheimsund Røde Kors i lang tid. Difor sette han i gang ein innsamlingsaksjon på internett. Responsen har vore enorm.

— Betyr alt

Innsamlingsaksjonen som far hennar sette i gang, hadde måndag føremiddag ført med seg bidrag på over 160.000 kroner.

— Kva betyr det for dykk?

— Det betyr alt. Me må jo tena pengane sjølve. Når me får ei slik støtte, har me plutseleg moglegheita til å utvikla oss, få ny kunnskap og til og med kjøpa ein båt, om me vil det. Det gjer at me kan vera endå betre rusta til ein annan gong, seier Jensen.

I aksjonen har lokallaget lånt båt frå Røde Kors Hordaland og frå lokallag i Kinsarvik, på Laksevåg og på Bømlo. Båten som er med på søk måndag, er lånt av Elkem Bjølvefossen. Det har vore snakk om å kjøpa ein eigen båt før, men det har aldri vorte noko av.

Mange i lokallaget har òg ytra ynske om å utvida kompetansen sin. Alle har søk- og redningskurs, og nokre har ekstra kompetanse på skred og bratt terreng — ei slags klatregruppe.

— No har klatregruppa i alle fall sett at behovet er der og er nok meir motivert for å halda på kompetansen. Eg ser nytten av å ha ei operativ klatregruppe, seier Jensen.