— Me har eit billeg bad, men det var vilkåret

Både Sp og H uttrykkjer vilje til å løyva meir pengar til drifta av badeanlegget — ikkje berre som naudhjelp i koronatida, men som ein permanent auke i driftsstønaden.

— Me kan koma i same situasjon neste år òg. Kanskje bør heradsstyret vera førebudd på at me bør sjå på heile finansieringa i komande budsjett. Det er lurt å ha i mente at summen frå Kvam herad kanskje bør aukast litt og ikkje gjennom enkeltvedtak, sa Ottar Randa (H) i heradsstyremøtet tysdag.

Jostein Ljones (Sp) røpte i formannskapsmøtet veka før at partiet kan vera villig til å auka den kommunale løyvinga. Til HF seier han at partiet er villig til å vurdera ein auke, men han vil enno ikkje meina noko om kor stor han kan verta. Partane i saka må no samarbeida om å finna tenlege driftsløysingar, meiner han.

— Det var vilkåra

Løyvinga vart i 2017 avgrensa til pengane heradet spara på å leggja ned fleire kommunale basseng. Summen vart av administrasjonen, som rådde politikarane frå løyvinga, kalkulert til 0,9 millionar kroner i 2017. Seinare har heradsstyret sett av 250.000 kroner i året til å støtta dugnadsdrifta av bassenget i Ålvik, som var ein del av vedtaket i 2017.

Kari Mostad (MDG) meiner det er endringa av spelereglane i ettertid som provoserer ein del. Ynsket om endring vart fremja av HB til Kvam herad etter to gode opningsmånader og før pandemien råka Øystese i mars 2020.

— Vilkåra då ein gjorde vedtaket, var noko anna. Kor reieleg har ein vore i arbeidet i HB? Det er litt av grunnen til at me diskuterer dette. Me har eit billeg bad, men det var vilkåret då me gjorde vedtak. Det å endra det i ettertid skapar misnøye, sa Mostad, som meiner HB vil vinna tillit på å spela med opnare kort.

Geir Madsen (SV) sa at politikarane fekk høyra at det var gode marginar i drifta i oppkøyringa til 2017-vedtaket. Om ein må ha meir pengar no, tilseier det at grunnlaget var for tynt, meiner han.

Må dokumentera etter kvart

Mostad og dei andre røysta saman med alle andre enn Frp for å løyva 1,5 millionar kroner frå Kvam herad i tilskot til HB — etter framlegg frå Ap vel å merka via Kvammabadet KF. Rådmann Anita Hesthamar stadfesta i møtet at denne framgangsmåten ser formelt korrekt ut for henne.

Frp ville nøya seg med 1 million og krevja «mellomlegget» dekt av eigarane av HB. Resten av 2020-underskotet på om lag 3,5 millionar kroner må kausjonistane dekkja, ifølgje vedtaket.

Løyvinga er ikkje utan vilkår. HB må leggja fram ein plan for drifta og prova at likviditeten er god, og dessutan visa Kvam herad rekneskap og besøkstal annankvar månad. Ordførar Torgeir Næss (Ap) seier til HF at Kvammabadet KF må fylgja opp vilkåra.

SV og R føreslo ei presisering av at løyvinga berre er knytt til koronapandemien, men fekk ikkje fleirtal.

— Alternativet er verre

Fleire påpeika at Kvam herad ikkje har noko val. Held ein ikkje badet ope, kan Kvam herad nemleg risikera å måtte betala tilbake store summar i moms og spelepengar. Partane er difor tvinga til å finna ei løysing, sa Madsen.

— Alternativa er mykje verre. Det årlege tilskotet frå 2017 står fast med dei premissane vedtaket la som føresetnader, sa Hans Arne Børsheim (KrF).

Håvard Gjerde (R) sa at hans parti har problem med den typen offentleg og privat samarbeid HB inneber, på grunn av risikoen som ligg i å knyta lovpålagde tilbod til kommersiell og konjunkturavhengig drift.

— Me skal ta lærdom av dette og tenkja oss om fleire gonger før me satsar så sprekt. Men når det er sagt, håpar eg at dette går seg til at korona er den store bøygen, sa han.

— Me må kunna spørja om det er rett at Kvam herad dekkjer underskot i eit privat selskap. Me kunne ha sagt at det er oss uvedkomande, men anlegget er drive for ålmenta. Det viktige er å få folk til å bada og at heradet ikkje trekkjer seg ut no. Det vil få store konsekvensar og bli veldig dyrt for oss, sa Even Øyri (Ap).

Ser «oppsider»

Dei fleste partia nytta høvet til å skryta av HB. Jostein Ljones (Sp), til dømes, understreka at Kvam herad har fått anlegget for ein billeg penge, og saman med det eit «nytt» hotell, helsehus og helseinstitusjon. Han viste til at det enno er god margin til det det ville ha kosta med eit reint kommunalt badeanlegg.

— Ei etablering og næringssatsing me må leita for å finna maken til, sa han.

Svein J. Stuve (Sp) meiner det er synd at kvemmingane ikkje fekk sjå korleis utviklinga kunne ha vore utan pandemien. Han meiner den kommunale innsatsen som han sjølv røysta for i 2017, er veldig låg.

— Det håpa me skulle gå og me håpar det kan gå i normale tider, sa han.

Stuve understreka at anlegget har gjeve store ringverknader.

— Om det er verdt prisen? Ja, verkeleg. Eg vil skryta av dei som har brukt masse arbeid og sjel og pengar på å få til noko i Kvam, sa han.

Ein gild og ein ugild bror

Gjermund Stuve er dagleg leiar i NLT Hordaland og Øystese Næringslag, som er høvesvis kausjonist, og aksjonær og kausjonist, i eigedomsselskapet. Han vart rekna som automatisk ugild i Hardangerbadet-debatten av di rådmannen ser på garantisten som part i saka, sidan vedtaket inneheld eit krav om at kausjonistane betalar for seg.

Også broren Svein Johannes tok, i motsetnad til i formannskapsmøtet i førre veke, opp spørsmålet om han kunne vera ugild i saka på grunn av slektskapen. Heradsstyret konkluderte, mot røysta til Håvard Gjerde (R), med at bindinga var for perifer og at han kunne delta i ordskiftet.