– Me har ansvar for å ta vare på naturen

Lokallaget har fått med seg NRK-saka om nedbygging av norsk natur, som går i eit tempo Kvam MDG tykkjer er skremmande høgt. I ei fråsegn vedteken av årsmøtet 6. februar hevdar lokallaget at det politiske fleirtalet i Kvam ofte ser vekk frå heilskapen i arealpolitikken når enkeltsaker vert handsama. Døme er at heradet har opna for planlegging av ei stor utbygging på Omastrand og eit masseuttak på Eide i Tørvikbygd, båe delar i strid med kommuneplanen.

– Det er godt dokumentert at naturkrisa og klimakrisa forsterkar kvarandre. MDG vil peika på at å lata vera å byggja ut natur er eit av dei beste tiltaka for å løysa både natur- og klimakrisa, uttalar laget i fråsegna.

Partiet tek til orde for snarleg rullering av både samfunns- og arealdelen av kommuneplanen, og meiner planstrategien må vera ferdig i fyrste halvår i år.

– All natur ligg i ein kommune. Det er vesentleg at kommunane har oversikt over natur og naturtypar generelt og særskilt natur som er viktige å ta vare på. Ein kan då ta ansvar for å sikra desse mot nedbygging eller øydelegging, heiter det i fråsegna.