— Me driv skulen så godt me kan
At smittebylgja er her, er det lite tvil om. Fleire av skulane i Kvam har høgt smittetrykk og jobbar hardt for å få dagane til å gå rundt.
— Måndag var nesten 60 elevar vekke frå skulen, seier Kari Ljones.
Ho er rektor på Kvam ungdomsskule og merkar godt at landet har «opna» att. Smittetala har stige jamt og trutt på ungdomsskulen, spesielt dei siste to vekene. Det går på opp, som rektoren seier.
— Klarar de å løysa situasjonen?
— Me driv skulen så godt me kan, og slår til dømes saman halvfulle klassar. Me har klart å løysa det så langt, fortel ho.
— Kor mange lærarar er vekke frå skulen?
— Eg vil ikkje gå ut med det. Folk er vekke av ulike grunnar, ikkje berre korona, seier Ljones.
Heitt tema
Bemanning er eit kontinuerleg tema, og Ljones har god dialog både oppover og sidelengs. Planar er klare om situasjonen vert verre.
— Det at både elevar og tilsette er vekke på same tid, er gjerne det som gjer at me klarer drifta, seier Inga Lill Jensen Tolo, leiar for skule i Kvam herad.
Fråvær er tema på møte i skuleleiinga, og løysingar vert diskuterte.
— Dei nye ordningane med å kunna bruka pensjonistar og overtid til tilsette og ekstra betaling har vore tiltak som har hjelpt, seier Tolo.
— Held pusten
På Norheimsund Friskule har det vore lite smitte, opplyser rektor Brit Gjerde Voster. Ein del foreldre og sysken av elevar har vore sjuke, men berre 4 av 40 elevar har vore heime med koronasmitte etter letten i smitteverntiltak.
— Men me held pusten, for å seia det slik. Eg er glad for kvar dag folk er her, seier rektoren.
Tysdag var alle tilsette og elevar på plass.
— Eg håpar me kan få det ein og ein. Og eg ser svart på den dagen eg sjølv er vekke, seier Voster.
— Har trua
I fleire av klasseromma på Norheimsund skule var det elevar som mangla tysdag. 40 elevar og 9 tilsette var vekke, opplyser avdelingsleiarane ved Norheimsund skule i eit skjermbrev til HF. Ikkje alt fråværet er koronarelatert.
Undervisninga går stort sett som normalt.
— Kva skjer om situasjonen vert verre?
— Slik det ser ut no, har me trua på å klara utfordringane, så sant ikkje alle dei tilsette vert smitta samstundes, skriv avdelingsleiarane.
Flinke på smittevern
Kvam vidaregåande skule har hatt nokre drypp av koronautbrot gjennom pandemien, men etter at landet opna opp att, har det vore forholdsvis roleg.
— Me ventar litt på «bylgja», men så langt så har det gått bra. Eigentleg så er eg positivt overraska, seier rektor Arild Matland på Kvam vidaregåande skule.
Berre fem elevar og éin tilsett var vekke på grunn av koronasmitte tysdag.
— Me har ein del lærarar med små born som må vera ein del heime, men det har eigentleg vore ganske roleg. Me er tydelegvis flinke til å overhalda smittevernet, seier Matland.
