– Me byggjer ikkje ny natur

Samnanger kommunestyre gjekk i november samla inn for å konsekvensutgreia nasjonalpark. Saka skapa ingen debatt, og Frøland personleg registrerte ikkje innspel frå grunneigarane.

I Kvam, derimot, sa eit knappast mogeleg fleirtal nei til å gå vidare. Det tek Frøland med fatning.

– Eg fekk inntrykk på folkemøtet i haust av at ein del ikkje hadde tru på dette. Det er litt trist at ein aldri fekk sjansen til å sjå meir på det. Det var jo berre snakk om å sjå nærare på det, seier Frøland.

– Verdi i seg sjølv

Til liks med varaordførar Frode Nygård (Frp) i Kvam påpeikar han at det var snakk om vern av monaleg mindre område i Samnanger enn i Kvam, og at det kan vera noko av årsaka til at det ikkje kom til uttrykk nokon skepsis.

Han påpeikar dei internasjonale ambisjonane om vern mot nedbygging av natur, og at debatten ikkje berre bør handla om mogelegheitene for å gjera noko i områda.

– Naturen har ein veldig verdi i seg sjølv. Det er ein viktig lærdom å ta inn over seg. Det vert ikkje bygt meir natur, seier han.

Hege Eide Vik (Sp), ordførar i Vaksdal, har ikkje sterke meiningar om vedtaket i Kvam.

– Eg vil ikkje synsa om det. Kvam er den største kommunen, og me har respekt for kva dei meiner, seier ho.

– Skjer ikkje meir

Miljødirektør Kjell Kvingedal hjå Statsforvaltaren i Vestland har fått med seg vedtaket til kvemmingane. Han ynskjer ikkje å meina noko om vedtaket, men konstaterer at det inneber at prosessen stoppar når det ikkje ligg føre lokal aksept.

– Me har nok å gjera på andre område. Det skjer ikkje meir frå vår side, seier han.

I Kvam handla ordskiftet om saka vel så mykje om sjølve nasjonalparken som om kunnskapsinnhenting og konsekvensutgreiing. Kvingedal meiner det var litt prematurt og at diskusjonen ville ha vorte ein annan om ein saman med kommunar, grunneigarar og organisasjonar fyrst hadde utarbeidd eit verneframlegg. På den andre sida har det heile tida vore klart at politikarane hadde høve til å dra i naudbremsen, påpeikar han.

Kvingedal fortel at han er kjend med at det i alle fall éin stad har enda med nei til nasjonalpark etter at politikarane fyrst har sagt ja til det fyrste steget i prosessen.

– Der endra den politiske stemninga seg. Så det er fullt mogeleg, seier Kvingedal.

Han seier han er nøgd med samarbeidet og prosessen som vart gjennomført i Kvam, og at Statsforvaltaren fekk fram bodskapen på ein god måte.

Les også: