– Me bergar turistbåten

Dimed vil partia – Ap, Sp, SV, KrF, MDG og V – løyva to millionar kroner i 2025. Året etter vert summen halvert til éin million kroner, for så å forsvinna heilt.

Tanken er å avvikla løyvinga og lata ruta gli over i reint kommersiell drift gjennom utvikling av tilbodet.

Pengane vert truleg henta frå fond, sidan dei ikkje skal vera varige utgifter. Om pengane i 2025 vil halda til ein like lang båtsesong som i år, veit Handegard ikkje, men i utgangspunktet er det tanken.

– Resten må takast inn gjennom ein auke i billettprisen, seier fylkestingsmedlem og jondøling Sigrid Brattabø Handegard (Sp).

Tanken er ifylgje framlegget å auka prisane til same nivå som turistbåtruta i Sogn og Fjordane.

Ho seier fleirtalskoalisjonen har fått innspel frå og hatt møte om saka med reiselivsaktørar. Meldinga frå dei har vore klar: Eit føreseieleg tilbod er viktig.

– Aktørane har vore konstruktive og peika på inntektspotensialet i billettakstane, seier ho.

Ho meiner, ut frå innspela frå næringa, at det er realistisk å auka inntektene. Ho påpeikar at Hardangerfjorden er eit reiselivsprodukt i verdsklasse, og at mange reisande er villige til å betala for det.

Ho opplyser at fleirtalet i same slengen ber Skyss om å vurdera om det er mogeleg å differensiera mellom billettprisar for turistar og for lokale ibuarar som reiser internt i Hardanger.

Handegard seier at også denne saka, som mange andre, har vore ein kamp å få gjennomslag for. Ho har samarbeidd godt med Emil Tomasgard (Ap), også han frå Ullensvang kommune, om henne.

Samarbeidspartia presenterte budsjettframlegget i finansutvalet måndag. Ferjekutta som var mykje omtala tidlegare i haust, er ikkje lenger ein stor diskusjon etter at det dukka opp nye millionar frå staten. Fylkesdirektøren føreslo difor å droppa kutt i mellom anna to ferjesamband i Hardanger.