MDG vil stoppe all nedbygging av matjord i fire år

MDG vil ha full stopp i nedbygging av matjord fram til 2026.

I tillegg vil partiet flytte makta til å bestemme om matjord kan verte bygd ned, frå kommunane og opp på eit nasjonalt plan, skriv Nationen.

Framlegget blei debattert i Stortinget denne veka. Under debatten sa Rasmus Hansson (MDG) at over 83.000 dekar matjord var foreslått nedbygd i lokale planar. Han gjorde det klart at målet med framlegget er at det skal bli vanskelegare å byggje ned god matjord. Arbeidarpartiet var ikkje støttande til framlegget frå Hansson og MDG.

– Politikk handlar om å gjere dei riktige vedtaka for å få resultata ein ynskjer, utan å få biverknader ein ikkje ynskjer. Det gjer det vanskeleg for Arbeidarpartiet å stø opp om framlegga som ligg her i dag, sa Per Vidar Kjølmoen (Ap) under debatten.

Kjølmoen meiner framlegget går utover det lokale sjølvstyret i kommunane. Eit forbod mot nedbygging av matjord meiner han òg vil gjere det vanskeleg å byggje nye vegar.

MDG får derimot ros frå Bondelaget.

– Vi vil rose MDG for at dei ser alvoret. Framlegget deira er eit viktig bidrag til å lage ein skjerpa jordvernpolitikk. Fram til matjorda har fått eit betre juridisk vern, må verkemidla verte skjerpa og meir forpliktande, seier Audhild Slapgård, styremedlem og ansvarleg for jordvern i Noregs Bondelag, til Nationen.

Næringskomitéen på Stortinget innstiller på å ikkje vedta framlegget frå MDG.

(©NPK)