MC-ulukke i Strandebarm: – Framstår alvorleg

Éin person vart alvorleg skadd i ei MC-ulukke i Strandebarm fredag kveld.

Meldinga om ulukka kom på X/Twitter klokka 18.44, etter at ho vart varsla til naudetatane klokka 18.33. Alle naudetatar rykte ut.

Éin motorsykkel og éin person var innblanda i hendinga, opplyser operasjonsleiar Stein Rune Halleraker i Vest politidistrikt til HF. Han fortel at ifylgje helsepersonellet på staden verkar MC-føraren å vera alvorleg skadd.

HF sin journalist på staden opplyste rett etter klokka 19 at luftambulansen hadde kome. Klokka 19.14 vart den skadde frakta bort med helikopteret, som landa på vegen ved ulukkesstaden.

Ulukka hende på ei rett strekning på fylkesveg 576, nær Fossehuset. Det er 60-sone på staden.

Fylkesvegen vart inntil vidare stengd der ulukka hende, og det samla seg kø i området. Klokka 20.15, nær to timar etter hendinga, fekk bilar passera ulukkesstaden i eitt køyrefelt.

Ulukkesgruppa til Statens vegvesen vart varsla om hendinga, opplyste politiet på X/Twitter klokka 19.50.

Politistasjonssjef Terje Sperrevik ved Kvam politistasjon fortel at den skadde er ein mann i 20-åra. Motorsykkelen køyrde i retning mot Tørvikbygd.

Til Bergens Tidende fortel konstituert politiinspektør i Kvam, Marita Flemmen Skogvoll, at motorsykkelen skal ha treft autovernet. Den skadde sjåføren skal ha køyrt saman med ein annan motorsyklist. Begge hadde hjelm på seg. Ingen er mistenkt for køyring i rusa tilstand.