MC-førar vart frifunnen i lagmannsretten
Domarane i Gulating lagmannsrett var ikkje samde i ankesaka etter ei alvorleg trafikkulukke i Tørvikbygd. Fleirtalet meiner MC-føraren ikkje kan lastast for ulukka.
Ulukka hende ved Berge i Tørvikbygd i fjor sommar. Ein ung kvemming på lett motorsykkel køyrde inn i ein personbil med tilhengar i samband med ei forbikøyring. MC-føraren vart kasta gjennom lufta og alvorleg skadd.
Politimeisteren i Vest gav ungdomen eit førelegg på 15.000 kroner etter hendinga. Påtalemakta meinte at han ikkje hadde vore aktsam nok, at skiltet på køyretøyet ikkje var synleg nok og at han hadde endra komponentar på køyretøyet.
I tillegg til bot meinte påtalemakta at førarkortet måtte kverrsetjast, og at MC-føraren delvis måtte ta førarkortet på ny om han ynskte å køyra igjen.
Kvemmingen, som på dette tidspunktet var 17 år gamal, vedtok ikkje førelegget. Då Hordaland tingrett dømde han i vinter, anka han saka. Gulating lagmannsrett tok stilling til henne i mai.
Klar meining i tingretten
I Hordaland tingrett sa føraren seg delvis skuldig etter tiltaleavgjerda. Han hugsa ikkje noko frå sjølve kollisjonen, men vedgjekk å ha skjult registreringsnummeret og tilpassa køyretøyet.
Tingretten konkluderte med at ungdomen hadde køyrt i strid med vegtrafikklova, og dømde han til å betala ei bot på 16.000 kroner, vera utan førarrett i eitt år og ta førarkortet på nytt om han ville køyra att.
Domen vart anka, og Gulating lagmannsrett samtykte under dissens til å fremja saka. Éin av domarane meinte at det ikkje låg føre gode nok grunnar til å ta opp att saka.
Anken galdt posten i tiltalen som handla om ikkje å vera aktsam i trafikken. MC-føraren sa seg heller ikkje i tingretten skuldig i dette.
Aleine om tvil
Aktor la ned påstand om ei bot på 18.000 kroner for ikkje å ha køyrt aktsamt, og tap av førarretten i eitt år. Forsvararen la ned påstand om at mannen vart frikjend for aktlaus køyring, og at han elles vart vurdert på mildast mogeleg måte. Sju personar vitna i saka.
I vurderinga av saka er lagdomarane Jarle Golten Smørdal og Carl Petter Martinsen usamde i skuldspørsmålet. Fleirtalet – altså Smørdal og fem meddomarar – meiner at det er for stor tvil om når føraren av personbilen sette på blinklyset, og om MC-føraren kunne ha sett det i tide. I og med at forbikøyringa starta rett før bilen svinga inn mot Stekkavegen, må føraren ha meint at ho var forsvarleg ut frå trafikkbiletet, meiner fleirtalet.
Fleirtalet meiner såleis at ungdomen ikkje kan dømast for å ha vore aktlaus etter vegtrafikklova.
Martinsen meiner på si side at åtferda til MC-føraren var «markant» aktlaus, og at han burde ha innretta seg etter trafikkbiletet på ein tryggare måte. Han la vidare stor vekt på vitneforklaringar og tidlegare åtferd frå ungdomen, og meinte at vilkåra for straff var oppfylte.
Vurderinga til fleirtalet førte til at MC-føraren vart frifunnen for aktlaus køyring. Også kravet om inndraging av førarkortet fall vekk. Samstundes vart han dømd til å betala ei bot på 10.000 kroner for å ha montert skilt feil og endra komponentar på motorsykkelen.
