Massevaksinerer to gonger i veka

— Folk kjem heller for tidleg enn for seint, seier Therese Moldøen.

Ho er i utgangspunktet sjukepleiar i heimesjukepleia, men arbeider no som vaksinekoordinator i Øystesehallen. Der held ho kontroll på kven som vert vaksinerte og om dei får fyrste eller andre dose.

— Me får liste over registrerte frå kommunen. Så ringjer me dei som ynskjer vaksine og gjev time til vaksinasjon. Når dei kjem i hallen, vert dei registrerte igjen, slik at dei kan henta ut vaksinepass, fortel Moldøen.

Etter registrering vert ein vist til ein stol av frivillige frå saniteten, og får sett vaksinen umiddelbart. Så lyt ein venta i tjue minutt før ein kan gå heim att. Dei frivillige spritar stolane etter bruk.

— Det fungerer veldig bra etter berre to veker. Det er ingen som treng å venta, seier Moldøen.

Klar til auke

Massevaksinasjonen føregår onsdagar og torsdagar. Kommunen får mellom 350 og 380 dosar kvar veke, så mellom 175 og 190 dosar vert sette per dag.

— I dag er det fem personar som set vaksinar samstundes. Det kan me auka om me får tilsendt fleire dosar. Det gjeld talet på stolar òg, seier Moldøen.

Dersom det kjem fleire dosar framover, vil det verta opna for vaksinasjon fredagar.

Utanom vaksinasjon av helsepersonell på Toloheimen vil alt føregå i Øystesehallen. Det gjeld både fyrste og andre dose, opplyser Øyvind Strømmen, informasjonsrådgjevar i Kvam herad.

Prioriter vaksine

Frå 16. juni får personar i alderen 55 til 64 år vaksine. Neste aldersgruppe er frå 45 til 54 år og byrjar etter planen 30. juni. Kvam herad oppmodar sterkt om å ta vaksinen på den datoen du fyrst får tilbod om, då det elles skapar utfordringar i planlegginga.

Du vil få alternativ, men dersom du ikkje kan takka ja til nokon av dei, vil du hamna bakarst i køen.

— Også etter andre grupper enn den du sjølv høyrer til, opplyser heradet.