— Massevaksinasjon i sommar vert tøft
I ei tid der Kvam herad ikkje har kome skikkeleg i gang med vaksineringa av risikogruppene, skal Austlandet no vaksinera friske og unge.
Regjeringa offentleggjorde på ein pressekonferanse onsdag kveld at dei vil fylgja råda frå Folkehelseinstituttet om skeivfordeling av vaksinar. Målet er å tilføra smitteråka kommunar fleire vaksinar. Kommunane som gjev frå seg vaksinar, lyt setja endå fleire vaksinar under ferieavviklinga i sommar.
— Me er betenkte over at regjeringa prioriterer på denne måten, seier ordførar Torgeir Næss (Ap).
Til no er om lag 2.300 personar i Kvam vaksinerte, og rundt 950 av dei er fullvaksinerte. Førre veke starta vaksinasjonen av gruppe 5, innbyggjarar i aldersgruppa 55–64 år, på liste B. Det er uvisst kor lang til det vil ta å vaksinera gruppa. Grunnen er at mange av vaksinedosane som kjem dei neste vekene, vert brukte som dose nummer to til grupper som er vaksinerte før.
— Ikkje forsvarleg
Avgjersla til regjeringa medfører at 309 kommunar i inntil sju veker får om lag 35 prosent færre fyrstedosar i gjennomsnitt enn det befolkningsnøkkelen tilseier. Omfordelinga er venta å starta i veke 23.
Helsedirektoratet har i lag med alle statsforvaltarar spurt kommunane om dei har kapasitet til å massevaksinera i veke 29, 30 og 31. 44 av kommunane har svara at dei ikkje kan vaksinera ekstra i denne perioden.
I tilbakemeldinga til Statsforvaltaren og Helsedirektoratet gav kommuneoverlegen beskjed om at Kvam herad vil klara å gjennomføra massevaksinering i veke 29—31 dersom det kjem tidleg nok melding om opplegget. Kommunelegen har òg svara at ein ikkje ser det som forsvarleg å utsetja vaksineringa av risikogrupper.
— Å gjennomføra ei massevaksinering i sommar vert tøft. Mykje kan skje. Får me eit massiv smitteutbrot under vaksineringa, vil det vera kritisk med tanke på kapasiteten vår, seier ordføraren.
— Treng djupare forklaring
Skeivfordelinga kjem seint og brått, og på eit svært upassande tidspunkt, meiner han.
— FHI har nok gode argument, men dei har også ei stor pedagogisk utfordring i å overtyda folk. Dette vert opplevd som urettferdig, seier ordføraren.
Hardangerrådet hadde eit møte torsdag der dei diskuterte avgjersla og vart samd om eit skriv til Statsforvaltaren. I skrivet påpeikar rådet utfordringane dette vil gje kommunane i distriktet. Hardanger-kommunane skriv at dei ser med uro på konsekvensane av regjeringa si endring av vaksinestrategi.
— Me ynskjer ikkje å protestera mot FHI sine faglege vurderingar, men me treng ei djupare forklaring på kvifor dei gjer som dei gjer, seier ordførar Næss, som er rådsordførar.
Særleg peikar Hardangerrådet på utsetjinga av vaksineringa av særleg sårbare grupper og praktiske utfordringar med massevaksineringa. Dersom særleg sårbare vert smitta, kan det få alvorlege konsekvensar.
— Når sommaren nærmar seg, aukar mobiliteten. Uroar det deg?
— Truleg vil ein del av dei som kjem på ferie, vera vaksinerte austlendingar, men me veit jo at større mobilitet utgjer større fare for smitte. Eg vert uroleg om me ikkje er ferdige med å vaksinera risikogruppene, seier ordføraren.
