Manglar regel om strøing på glatta

Ordførar i Kvam, Torgeir Næss (Ap), seier at huseigarane likevel har eit ulovfesta, objektivt ansvar for å halda fortaua trygge, og at dette gjeld heilt uavhengig av politivedtektene.

– Bør presiserast

– Men politivedtektene kan både vera ein peikepinn på og ei presisering av kva som gjeld av plikter for huseigarane, slik at ein veit kva ein skal retta seg etter. Eg er einig i at det bør presiserast i politivedtektene våre at det er ei plikt å strø når det er glatt. Men huseigar har uansett ei plikt til å halda fortauet utanfor husa sine så trygge som dei kan. Viss nokon dett og skamslår seg, kan ein verta erstatningsansvarleg, i verste fall.

– Med dagens reglar òg?

– Ja, det er eit ansvar som er kome til via sedvane og rettspraksis, men som ikkje er lovfesta. Enkelte kommunar vel å vedtektsfesta strøing for å visa folk kva som gjeld. Det ser eg at me heilt klart bør gjera i Kvam òg. Me har reglar for takras og snørydding, men eg ser at det er ein mangel i politivedtektene våre at reglane ikkje er presiserte, seier Næss.

Det tek alltid ei viss tid å endra politivedtektene, så ein ny regel vil uansett ikkje verta gjeldande før seint i vinter eller til neste år.

– Men det kan godt skrivast i HF at plikta huseigarane har til å halda fortaua trygge, gjeld uavhengig av om det er presisert i politivedtektene eller ikkje, seier ordføraren.

– Folk forstår det

Lensmann Terje Sperrevik i Kvam, Samnanger og Tysnes lensmannsdistrikt får få eller ingen klager på at folk ikkje strør når det er glatt og naudsynt.

– Manglande strøing har ikkje vore eit stort problem for oss slik eg oppfattar det, seier han.

Bergens Tidende har denne veka skrive at mange har skadd seg på glatte fortau.

– I Bergen har dei eit punkt om at huseigar pliktar å strø på fortauet utanfor eigedomen når det er glatt?

– Bergen er ein by og har ei litt anna tilnærming til det, tenkjer eg. Det er kommunane sjølve som fastset politivedtektene. Punktet om glatta er ikkje noko sakn, slik eg ser det. Dei aller fleste forstår behovet for å strø, og gjer det. Det er ei litt lettare tilnærming ute i distrikta. På landsbygda har ein nærare eigarskap til ting, seier Sperrevik.

– Eg ser at ein sjølvsagt kunne freista påpeika dette når vedtektene skal justerast igjen, legg han til.

– Me kan oppmoda folk om å strø, men dei har forståing for behovet. Oppsummert så har ikkje dette vore eit problem for vår eining, korkje i den eine eller andre kommunen, seier lensmannen.

Takras til fare

Eit fall på gata kan skada den uheldige, men er sjeldan dødeleg. Takras, derimot, kan vera fatalt. Det strenge ansvaret for å fjerna is og snø frå taket ligg hjå huseigar, skriv Norske Boligbyggelag (NBBL) i ei pressemelding.

– Som huseigarar har burettslag og sameiger ansvaret for å fjerna snø og is frå taket. Dersom nokon får ein isklump i hovudet, er det stor risiko for at bustadselskapet vert økonomisk ansvarleg. Dette gjeld også for skadar på til dømes bilar. Fordi skadepotensialet er stort, er også ansvaret strengt. Det skal lite til før huseigaren vert halden ansvarleg for å ikkje ha overhalde plikta til å rydda, seier advokat Line C.B. Bjerkek i NBBL.

Ved fare for takras må bustadselskapet sørgja for at forbipasserande er varsla ved bruk av avvisarar. Men jobben er ikkje gjort før rasfarleg is og snø er fjerna. Å unnlata fjerning av snø og is frå tak, er straffbart. Brot på politivedtektene kan føra til bøter og i verste fall fengsel.

Dersom det er rasfare, skal taket ryddast snarast mogleg.

– Bustadselskapet må sørgja for å ha rutinar for å førebyggja rasfare. Taket må inspiserast regelmessig. Det er nemleg ikkje tilstrekkeleg å fjerna is og snø når det vert oppdaga, seier Bjerkek.

Ho rår også til at bustadselskapet forsikrar seg om at bygget er i ein slik teknisk tilstand at risikoen for snøras er så liten som mogleg, til dømes ved å montera snøfangarar. Det er ei ålmenn plikt å ikkje utsetja andre for fare.