Manglande straumstøtte kan ramme gravferder

Kyrkjerådet fryktar at den økonomiske situasjonen til kyrkjelydane i landet kan føre til at gravferder må flyttast, kyrkjer blir stengde og kyrkjelydar må ty til oppseiingar.

Hittil er ikkje Den norske kyrkja, med unntak av enkelte kyrkjelydshus, omfatta av nokre statlege tiltak, skriv Vårt Land.

I Oslo er temperaturane i kyrkjene senka til 15 grader, og Kyrkjeleg fellesråd i hovudstaden førebur seg på å senke temperaturen til 10 grader på grunn av dei auka straumprisane.

I Halden har det kyrkjelege fellesrådet vedteke at fem av åtte kyrkjer må stengjast. I juli hadde fellesrådet brukt straum for 1,5 millionar kroner. Årsbudsjettet for fellesrådet på straum er 930.000 kroner.

Kyrkjerådsdirektør Ingrid Vad Nilsen er bekymra over situasjonen dei kyrkjelege fellesråda står i.

– Eg ser mest alvorleg på at gravferder må flyttast eller gjennomførast i kalde kyrkjerom. Det er verken ope eller inkluderande for sørgjande i ulike aldrar og livssituasjonar å fryse på kyrkjebenkene, skriv ho i ein e-post til avisa.

Ho fryktar at viss det ikkje kjem noka straumstøtte frå staten, kan det i verste fall ramme gravferder og fellesskap i kyrkjene, og det kan bli oppseiingar.

I eit høyringssvar til regjeringa har Kyrkjerådet bede om at Den norske kyrkja blir innlemma i den eksisterande straumkompensasjons-ordninga for frivillige organisasjonar.

(©NPK)