Mange vil ha lågare promillegrense til sjøs
Ei ny gransking viser eit fleirtal for at promillegrensa til sjøs bør senkast. Promillegrensa i båt er i dag fire gonger høgare enn for bil.
I ei spørjegransking Norstat har utført for Frende Forsikring svarer 58 prosent at promillegrensa til sjøs burde vore lågare enn dagens 0,8, medan 15 prosent er usikre på om grensa er for høg.
– At berre 3 av 10 vil halde på dagens grense seier sitt. Her er ikkje folkeopinionen i takt med regelverket i det heile. Det er sjeldan vi ser at folket vil ha strengare reglar enn styresmaktene, slik som dette, seier fagsjef båt i Frende, Edmond Wold Gaulen, i ei pressemelding.
Artikkelen held fram under annonsen.
Redningsselskapet vil ikkje ta stilling til promillegrensa, men har meiningar om alkohol og båtliv.
– Tankar om promillegrenser overlèt vi til politikarane, men det er interessant at fleirtalet av dei spurde meiner grensa burde vore lågare. Vi seier klart og tydeleg at alle som fører båt skal vere edru, seier informasjonssjef i Redningsselskapet Frode Pedersen.
