Mange tyskarar kom med cruiseskip
Cruisesesongen i Hardangerfjorden gav 88 skipsanløp og 172.064 gjester til Eidfjord og Ulvik.
Det skriv dagleg leiar Helge Møller i Cruise Destination Hardangerfjord (CDH) i ei pressemelding.
Det har aldri tidlegare vore så mange passasjerar i indre Hardangerfjord, trass i ein nedgang i talet på skip. Nokre cruiseskip vitja Odda og Rosendal, men dei har CDH ikkje oversikt over.
Det kom 98.000 tyskarar til Ulvik og Eidfjord i år. Det er ein auke på 18.000 gjester frå i fjor. På andreplass kjem USA med 21.000 gjester, som er 2.000 fleire enn i 2022. Andre store nasjonar er Storbritannia med 18.000 turistar og Nederland med 11.000 gjester. Det var ei dobling i talet på asiatar, 2.071 gjester mot 1.055 i fjor.
CDH har notert 93 tingingar for 2024, 95 i 2025 og 36 i 2026. Viss skipa kjem med maksimal passasjerkapasitet, vil ein kunna ynskja velkomen om lag 200.000 gjester både i 2024 og 2025. I 2026 er det førebels notert 43.000 gjester.
Møller går av 1. november, og då overtek Inge Tangerås cruisesatsinga.
