Mange slepp skatt
Ei rekke lag og foreiningar i Jondal kan gle seg over at dei slepp eigedomsskatt i skatteåret 2023.
Det vart klart då kommunestyret i Ullensvang onsdag 21. desember avgjorde kven som får fritak.
Eigedomar som har historisk verdi og eigedomar som tilhøyrer stiftingar og institusjonar «som tek sikte på å gagna ein kommune, eit fylke eller staten», kan sleppa eigedomsskatt. Det er ein føresetnad at hovudføremålet ikkje er å gje forretningsliknande overskot.
Både Hardangerakademiet og oppgangssaga i Herand slapp skatten på grunn av historisk verdi. Jondal Båthamn og forsamlingshusa til Herand Bygdelag, Nedre Krossdalen Grendalag, Jondal Ungdomslag, Torsnes Ungdomslag og Kysnes Ungdomslag slepp skatten fordi laga gagnar det offentlege. Det same gjer bygga til Jondal Skyttarlag og Jondal Idrettslag.
Nokre av dei som hadde søkt om fritak, kom berre halvvegs i mål. Herand Båtlag slepp halve eigedomsskatten for båthamna i Herand. Dette vert grunngjeve med at båtlaget sommarstid leiger ut kafédelen i det eine bygget til pizzarestauranten Meieriet. Meieriet er ei næringsverksemd, og kommunen ikkje ønskjer konkurransevriding.
Båtlaget vert neppe ruinert av å betala halv eigedomsskatt. Den halve eigedomsskatten er på 805 kroner.
