Mange nestenulykker i landbruket
Mange nestenulykker og mindre uhell på norske gardsbruk blir aldri rapportert, viser ei undersøking.
Det siste året har 14 prosent av bøndene opplevd nestenulykke eller ulykkeshending av så lite omfang at det ikkje er registrert, ifølgje ei måling gjort av Agri Analyse for Landkreditt.
Sju prosent oppgav dessutan at dei hadde hatt meir enn éi slik hending i samband med arbeidet på garden.
Artikkelen held fram under annonsen.
Sannsynlegvis er omfanget av nestenulykker endå høgare enn det som kjem fram av den nye undersøkinga, meiner Bjørn A. Hvaleby, fagsjef for Kvalitetssystem i landbruket (KSL) i Stiftinga Norsk Mat.
– Etter ein travel arbeidsdag går nok mange slike hendingar i gløymeboka. Dermed går ein del risikotilfelle under radaren, seier Hvaleby.
Ifølgje bøndene sjølv er dei mest vanlege årsakene aktløyse og at dei «berre skulle» få unna endå ei oppgåve før arbeidsøkta vart avslutta.
– Det store fleirtalet av bønder tek tryggleik på alvor, men garden er framleis ein farleg arbeidsplass og innsatsen for å minimere risikoen for skadar og ulykker må halde fram, seier Bjørn A. Hvaleby.
(©NPK)
