Mange aviser mistar tingarar
Opplagstala syner at også HF har mista tingarar det siste året.
Denne veka la Landslaget for lokalaviser (LLA) og Mediebedriftenes Landsforening (MBL) fram nye opplagstal. Tala samanliknar andre halvår i 2023 med 2. halvår i 2022, og syner at HF har mista 130 tingarar. I 2. halvår 2023 hadde bladet 4.821 tingarar. I andre halvår 2022 var talet 4.951.
Komplettopplaget, altså papir i tillegg til digitalt abonnement, har gått ned med 291. Det digitale opplaget har auka med 172.
Også dei andre avisene i Hardanger hadde nedgang. Hardanger Folkeblad fekk ein reduksjon i opplaget på 190, Hordaland på 605 og Kvinnheringen på 132. Best ut kom Grenda, som mista berre 15 tingarar.
Ifølgje LLA har om lag halvparten av medlemsavisene hatt ein auke i talet på tingarar. Totalopplaget for dei 110 avisene auka med om lag 2.000 eller 0,6 prosent.
Ein titt på tala til nokre aviser rundt HF syner at berre Os og Fusaposten har hatt ein oppgang i opplaget.
