Mana til moderasjon

– Tenk deg om før du drikk alkohol når det er born til stades!

Det var bodskapen på Av-og-til-standen på Vinmonopolet fredag. Samstundes vart fleire gode alkoholfrie alternativ viste fram. Opplegget var eit samarbeid mellom Vinmonopolet, Kvam herad og kampanjeorganisasjonen Av-og-til.

Dette er fjerde året ein har Av-og-til-arrangement i samarbeid med Vinmonopolet, fortel Av-og-til-koordinator Bjørnar Dagstad. No har dette vorte vanleg i heile landet.

– Korleis vert de mottekne?

– Folk er hyggjelege og interesserte i produkta. Mange vert litt overraska over at desse alkoholfrie alternativa smakar så godt, seier Dagstad.

– Du kjenner deg ikkje som helsefanatikaren som deler ut gulrøter i sjokoladebutikken?

– Kanskje litt, særleg dei første gongene me gjorde dette. Men Av-og-til handlar ikkje om at folk skal verta fråhaldsfolk. Det handlar om at ein skal tenkja gjennom når det passar å drikka alkohol. Det gjer det lett å stilla seg bak dette.

Butikksjef hjå Vinmonopolet i Norheimsund, Britt Ingvild Djupevåg Torvik, fortel at dei alkoholfrie produkta framleis utgjer ein liten prosentdel av salet på polet, men at dette er ei av produktgruppene som aukar mest.

– Kva skil dei alkoholfrie produkta de sel frå safta, jusen og brusen ein kan kjøpa i daglegvarebutikkar?

– Dette er produkt som alle er baserte på ekte råvarer, og me meiner dette er kvalitetsprodukt. Det finst mange gode produkt å velja mellom både når det gjeld alkoholfrie vinar, øl og sider. Det finst til og med alkoholfritt brennevin, men det vart så raskt utselt frå lageret at me ikkje fekk tak i det, fortel butikksjefen.