Måler minstevassføring i elv

Det går fram av eit brev frå Noregs vassdrags- og energidirektorat (NVE).

6. april varsla NVE Hardingsmolt AS om at etaten ville vurdera å gjera vedtak om retting dersom verksemda ikkje kunne leggja fram måledata for minstevassføring som er sleppt frå Tørvikvatnet. Fristen for å senda inn detaljerte planar for målingar vart sett til 1. juni 2022.

29. april tok NVE imot ein plan frå verksemda, og konkluderte i eit brev 9. september med at det ikkje var aktuelt å gjera vedtak om retting.

Kom på inspeksjon

I brevet 9. september ber NVE om at den endelege løysinga skissert i planen vert dokumentert med bilete og skildringar og send NVE. Då etaten ikkje fekk slik dokumentasjon, tok NVE initiativ til eit tilsyn. Det vart gjennomført 8. november som ein inspeksjon på anlegget saman med representantar for Hardingsmolt.

I tillegg til orienteringa i felt fekk NVE ei orientering frå Norconsult AS der firmaet skriv at det vart montert to måleinstrument 10. juni. Ein målar vart sett i Tørvikvatnet og ein annan i elva nedom vatnet. Målingane er gjennomgåtte og kvalitetssikra. Dei vil gje Norconsult grunnlag for å rekna ut vassføringa som har vore sidan målingane starta.

Må halda fram målingar

Det er naudsynt å halda fram med målingane i vinter for å få ein lengst mogleg måleserie og for å få med periodar med lågt tilsig til Tørvikvatnet, skriv NVE.

Etter vurderinga til NVE gjev den samla orienteringa tilstrekkeleg dokumentasjon på at det er etablert eit system som mellombels loggfører vasstanden i Tørvikvatnet og på ein utvald stad i elva.

Norconsult vil ha eit grunnlag for å føreslå ei endeleg og permanent løysing for slepp og dokumentasjon av minstevassføringa i elva nedanfor vatnet.

NVE minner om at ein endeleg plan til vanleg krev planhandsaming. Dette avheng mellom anna av omfanget av løysinga. NVE rår difor til at planen for endeleg løysing vert drøfta før endeleg etablering.