Mål om skulestart i 2027

Det sa prosjektleiar Bjarte Rasmussen i ABO Plan & Arkitektur AS då han orienterte Kvam formannskap om skuleprosjektet torsdag 13. juni. Dei 250 millionane inkluderer alt av bygningsarbeid, uteområde, oppgradering av veg og parkering, vatn og avløp, innreiing og mellombelse skulebygg. Også løns- og prisstigning og marginar er det teke høgd for, opplyste Rasmussen.

– Tala er veldig førebelse, men likevel innanfor ein margin på ti prosent. Skulen vil kosta om lag 250 millionar kroner.

– Er gjennomførbart

Etter orienteringa spurde Gjermund Stuve (Sp) kor mykje som er sett av til modulbygg til undervising i anleggsperioden. Ti millionar kroner var svaret. H har teke til orde for i staden å kjøpa Kvam vidaregåande skule som mellombelse lokale. Han er taksert til 16,5 millionar kroner.

– Er det forsvarleg å ha elevar i området samstundes som det går føre seg anleggsarbeid? spurde Geir Madsen (SV), og sikta til at rådmannen planlegg å nytta «36-bygget» på skuletomta i anleggstida.

Dette vert tenkt på heile tida, og det er ikkje fyrste gong det er ei utfordring, sa Rasmussen. Å byggja om skular i drift kompliserer og fordyrar. For Øystese skule var det i utgangspunktet tenkt ei enklare løysing, opplyste han.

– Å ha undervisingsareal i anleggsområdet må takast på høgaste alvor. Det krev mykje planlegging, men er absolutt råd å gjennomføra, sa Rasmussen.

300 elevar

Ifylgje framdriftsplanen som Rasmussen viste til, skal konkurransedokumenta vera klare i slutten av august og publiserast i starten av september. Konkurransen handlar om både pris og design. Planen er å prekvalifisera tre eller fire entreprenørar som kjem med eigne forslag om korleis skulen og skuleområdet kan sjå ut.

Parallelt vert det lagt fram eit pristilbod, og ein jury med både intern og ekstern kompetanse skal evaluera forslaga, opplyste Rasmussen.

Prosjektet tek utgangspunkt i ein skule for 300 elevar, fordelte på 14 klasserom. 8 klasserom for 20 elevar, 4 klasserom for 24 elevar og 2 klasserom for 30 elevar. Makskapasiteten vert altså 316 elevar.

Skuleåret 2024/2025 har skulen om lag 250 elevar.

Skal sjå på skulestruktur

I same møtet som administrasjonen orienterte om skuleprosjektet, gjekk eit samrøystes formannskap inn for å bruka inntil éin million kroner på ekstern konsulenthjelp til vidare arbeid med innsparingsprogram og endra struktur. Det låg an til å verta vedteke i heradsstyremøtet 20. juni.

Rådmannen viser i utkastet til økonomiplan fire teoretiske alternativ til korleis skulestrukturen kan sjå ut. Alle alternativa vil påverka Øystese skule. Mellom alternativa er å ha éin barneskule i Øystese for alle elevar frå 1–7. trinn i Kvam. Alternativa er døme og ikkje meinte som konkrete framlegg, påpeikar rådmannen i utkastet.

Føremålet med ei utgreiing er å tilpassa skulestrukturen til rekrutteringsutfordringar, dei økonomiske rammene og den venta nedgangen i elevtal, skriv ho.

14. juni spurde HF rådmann Anita Hesthamar om strukturendringar som råkar Øystese skule, ikkje er aktuelle og difor skal utelatast frå strukturvurderinga, sidan arbeidet med byggjeprosjektet ser ut til å gå sin gang. HF har òg spurt om kva fylgjer strukturendringar vil få for byggjeprosjektet dersom også framtida til Øystese skule skal vurderast.

Ei purring vart send 18. juni. Då denne artikkelen vart publisert, hadde rådmannen enno ikkje svara på spørsmåla.

Varaordførar Frode Nygård (Frp) hadde ikkje tenkt på koplinga då HF tok kontakt.

– Eg har heller ikkje tenkt at nokon skular ikkje skal vera med vurderinga, seier han.

Ordførar Torgeir Næss (Ap) seier til HF at han meiner at arbeidet med Øystese skule må gå sin gang, og at den varsla strukturvurderinga må ta utgangspunkt i det.