Mai vart rekordvarm

Nedbørsmengda i heile Noreg var 65 prosent av normalen i perioden 1991 til 2020, medan landstemperaturen var 4 grader over normalen i same periode, skriv Meteorologisk institutt i den klimatologiske månadsoversikta for månaden.

Mai 2024 er saman med mai 2018 dei varmaste mai-månadene som er registrerte i Noreg. Det vart sett fleire enn 150 varmerekordar.

Tal frå nettsida seklima.met.no fortel om fortel om høge temperaturar og lite nedbør også i Kvam og Jondal.

Målestasjonen på skisenteret på Folgefonna registrerte ein middeltemperatur på 7,7 grader, som er 5,6 grader over normalen i perioden 1991–2020.

På Kvamsøy var middeltemperaturen 15,5 grader, eller 4,9 grader over normalen. På Jonshøgdi på Kvamskogen var middeltemperaturen 13 grader, noko som er 5,8 grader over normalen.

Det kom 34,6 millimeter med nedbør på Kvamsøy. Det er 40,2 prosent av normalen. På Jonshøgdi var nedbørsmengda 51 millimeter, noko som er 38,9 prosent av normalen.

Stasjonen på skisenteret på Folgefonna manglar nedbørstal for mai, men i Øvre Krossdalen kom 24,1 millimeter nedbør. Det er 22,5 prosent av normalen.