Mai opnar med snø og kuldegrader

Den første maihelga startar med kaldt gufsevêr i sør, som trekkjer nordover. På Sør-Austlandet er det sendt farevarsel om snø i høgareliggjande strøk.

Nokon er kanskje litt takksame for at 1. mai-arrangement i år er flytta frå gater og torg til digital strøyming og samling rundt skjermar.

Frå Agder og nordover til Innlandet kan det falle snø i strøk som ligg over 400 meter.

– Det er ikkje nødvendigvis så store mengder, kanskje 5–15 centimeter, seier vakthavande meteorolog Marit Berger.

Obs på sommardekk

Hytteforbodet er oppheva, og det er langhelg. Mange hadde kanskje planlagt å reise bort.

– Det er grunnen til at vi sende ut farevarsel. Det er seint på året, og mange har nok lagt om til sommardekk, seier meteorologen.

Helga blir kald og våt i Sør-Noreg generelt. Mest nedbør fell på austsida av fjella, men det blir òg byer i vest. Nord for Stad blir det truleg opphald, i alle fall laurdag.

Nedbøren minskar gjennom helga på Sør-Austlandet, og søndag blir etter kvart venta opphald. Temperaturane held seg ganske låge.

– Det er ikkje superhøge temperaturar, nei. Dei kan nok kome på minussida på nattetid, og det blir nok ikkje særleg meir enn rundt 10 grader om dagen heller, seier Berger.

Lågtrykk trekkjer nord

I Trøndelag blir det venta regnbyer utover dagen laurdag. Det blir vestleg og nordvestleg pålandsvind, og også her forholdsvis kjølig vêrtype.

Nord-Noreg får det finaste vêret fram til helga. Her blir det frålandsvind, sol og lite skyer.

– Gradvis blir det gråare òg her, og det kjem nedbør utover helga. Lågtrykket frå Sør-Noreg rører seg nordover. Men det kan bli litt mildare, sidan lågtrykket tek med seg fuktig og mildare luft, seier Berger.

Neste veke kan det likevel bli kaldare att, og meteorologane ventar snø i dei nordlegaste områda.

(©NPK)