– Må vurdera å ta ut delar av vegprosjektet
Vegtiltak i Samnanger kan verta droppa dersom samningane held fast ved at dei ikkje vil betala bompengar for tunnelen under Kvamskogen.
Det opplyser John Martin Jacobsen, seksjonsleiar for forvalting, utgreiing og geodata ved avdeling for infrastruktur og veg i Vestland fylkeskommune. Ifylgje han må fylkeskommunen vurdera å ta ut delar av prosjektet, særskilt mellom Fossen Bratte og Eikedalen, dersom samningane ikkje ynskjer å bidra.
Eit nei til bompengar i Samnanger vil gjera det meir utfordrande å finansiera prosjektet. Det vert eit politisk spørsmål, opplyser Jacobsen til HF.
Han påpeikar at det viktigaste i fyrste omgang er å få ein godkjend reguleringsplan for tunnelen. Utan denne er det korkje trong for ein finansiereringsplan eller mogeleg å senda ein bompengesøknad til Vegdirektoratet.
– Ein endeleg bompengesøknad krev vedtak i kommunestyra og i fylkestinget. Me kan nok gjera eit førebuande arbeid, men ikkje gjera ferdig eit fagleg grunnlag utan vedtak i kommunestyra. Ettersom prosjektet også omfattar Samnanger kommune, må det mest truleg gjerast vedtak i begge kommunestyra, sjølv om bommen står i ein av kommunane, skriv Jacobsen i ein e-post til HF.
