Må velja kurs i reiselivet
Bør kommunane i Hardanger vera med og spleisa på ein regional reiselivsstrategi?
Kostnaden med ein slik strategi kan verta 290.000 kroner for Kvam herad og 435.000 kroner for Ullensvang kommune. Eidfjord og Ulvik kan få same kostnad som Kvam, medan Kvinnherad kan sleppa unna med 145.000 kroner.
Det går fram av ei sak til møtet i Hardangerrådet i Odda 8. november. Det er kommunane i Hardanger, pluss Kvinnherad, som har teke initiativ til prosjektet. Planen er at Visit Hardangerfjord AS skal gjennomføra det for dei.
Selskapet har søkt om stønad frå kommunar, sparebankstiftingar og fylkeskommunen. Til no ligg berre 450.000 kroner frå fylkeskommunen i potten. Sparebankstiftinga i Kvinnherad har avslege søknaden. Dersom tilsvarande stifting i Hardanger løyver pengar, vert summen trekt frå dei kommunale ytingane.
I 2020 sette Visit Hardangerfjord i gang arbeidet med eit forprosjekt for ein reiselivsstrategi. Det vart fullført i 2022. Utanom det finst ingen regional strategi på feltet. Ein slik strategi er ein føresetnad for at regionen skal verta sertifisert som berekraftig reisemål, ei ordning administrert av Innovasjon Noreg.
Mellom dei skisserte emna i strategien er mål, lønsemd, infrastruktur, tilgang, arbeidskraft, besøksforvalting og organisering. Det overordna målet bør vera å utnytta potensialet i Hardanger som reisemål, heiter det i søknaden om stønad.
