Må utbetra feil
I eit branntilsyn i Bjørketeigen barnehage vart det avdekt ei rekkje avvik.
Det kjem fram i tilsynsrapporten frå branninspektør Malin Namdal i Kvam brann og redning. I oppsummeringa står det at både eigar og brukar av bygget har fokus på at det skal vera trygt for tilsette, barn og andre.
Under tilsynet hadde brann- og redningsvesenet ein gjennomgang av krav som vert stilte til eigar og brukar når det gjeld branntryggleik. I tillegg vart dokumentasjon gjennomgått og det var dialog om manglar og forbetringspotensial på enkelte punkt, står det i rapporten.
Det var synfaring i delar av bygga, og vart utført stikkprøvekontroll av enkelte branntekniske installasjonar.
Brukar, representert av barnehagestyrar Ann-Kristin Strømme Bråten, må etablera eit system med oversikt over evakueringsrutinane for alle avdelingar. I rapporten kjem det fram at nokre av avdelingane ikkje kan dokumentera rutinane, fordi dei vert drøfta munnleg og ikkje er skriftlege.
Utbetringslista var lengre for barnehageeigarrepresentantane Jostein Neteland og Arne Johan Heggland. Brannteikningar var ikkje oppdaterte etter ombygging av barnehagen. Eigarane må sørgja for at planar som viser rømmingsvegar og plassering av sløkkjeutstyr, vert ferdigstilte og gjort tilgjengelege for brukar av bygget.
Tilsynet avdekte at det mangla dokumentasjon av kontrollar av brannalarmanlegg og brannslangar. Det kom fram under tilsynet at det er ein utleigedel i underetasjen av administrasjonsbygget. Leigetakar får opplæring i bruk av brannalarmanlegget, men dette er ikkje dokumentert. Vidare kan det ikkje dokumenterast at det er vurdert om det er nødvendig med samordning av bruk, heiter det i rapporten.
Rapporten peikar og på manglande kunnskap om krava til branntryggleik for byggverket og om installasjonar som skal oppdaga eller avgrensa konsekvensane av brann. Det manglar òg ei branndør i administrasjonsbygget, mellom lagerdelen og administrasjonsdelen. I brannkonsept frå 2022 er det i teikningane merkt at det skal vera brannskiljevegg og branndør mellom dei to delane av bygget. Eigarane må byta døra i tråd med dette.
Innan 15. november må barnehagen senda ei skriftleg tilbakemelding med framdriftsplan. Planen må innehalda informasjon om korleis avvika skal rettast opp, når dei skal utbetrast og kven som har ansvaret.
