– Må sjå kritisk på areala

I ei fråsegn frå årsmøtet ber regionlaget kommunestyra i Hordaland om å sjå kritisk på både gamle og nye areal for havbruk. Ifylgje forbundet er det ein lang veg å gå for å nå målet i naturavtalen som vart vedteken i Montreal. I avtalen, som mellom anna Noreg har forplikta seg til, står det at 30 prosent av alt hav skal vernast, og at 30 prosent av degradert økosystem skal restaurerast.

Naturvernforbundet meiner at ein lyt sjå nærare på miljøproblema oppdrettsindustrien fører til.

– Lakselus, infeksiøs lakseanemi og pankreasjukdom heimsøkjer havbruksnæringa i Hordaland som ei mare. Fiskehelsa er på lågmål og trugsmålet mot vill laksefisk kritisk, skriv det.

Talet på lakselus og dødelegheit aukar jamt i Hordaland, hevdar forbundet, som meiner det ser mørkt ut for fiskehelsa i merdane og villaksen.

Forbundet meiner at situasjonen mellom anna i Hardangerfjorden er alarmerande, og er kritisk til at fleire kommunar opnar for større areal og volum. Forbundet hadde venta kommunane tok føringane til regjeringa på alvor i arealplanar.

Det er likevel håp, meiner forbundet. Det viser til at den interkommunale planen for Nordhordland snart er klar, og at andre kommunar planlegg revisjon av sjøareala i kommuneplanen.