Må rydda opp ved Mulen

Det kjem fram i eit brev frå kommunen til verksemda 16. september.

Saka byrja med at Hardanger Naturvernforbund i fjor haust slo alarm om aktiviteten i hyttefeltet i Mælsheiane, i området mellom Mulen og Mælsvegen. Kommunen bad om ei utgreiing frå Ullensvang Holding i februar, men fekk ikkje svar innan fristen. Eit førehandsvarsel om pålegg om retting vart sendt til verksemda i mai, med krav om retting innan 31. juli.

Ikkje svar

Ullensvang kommune har ikkje høyrt frå utbyggjaren. Verksemda er eigd av Hardanger Maskin AS, som gjekk konkurs i vinter. Førehandsvarselet er difor sendt med kopi til Advokatfirma Romstad, som er bustyrar.

Kommunen peika på fleire punkt etter synfaringa i vår. Den felles parkeringsplassen er større enn det som vart godkjent. Ein stor mur ved parkeringa og tre bilvegar er ikkje søkt om og i strid med reguleringsplanen, i tillegg til endå ein mur som er opparbeidd utan løyve. Dessutan er det hogd hole eiker i området. Naturmangfaldlova seier at det skal takast særskilt omsyn til utvalde naturtypar, til dømes slike eiker.

Sistnemnde punkt vert ikkje fylgt opp av kommunen, men er sendt til Miljødirektoratet og Statsforvaltaren.

Frist ut året

Ifylgje Hardanger Folkeblad, som fyrst omtala pålegget, trekte Tore Eiken seg frå rolla som styreleiar i Ullensvang Holding i slutten av mai.

Då HF kontakta Eiken i samband med at kommunen bad om ei utgreiing, sa entreprenøren at det skal vera søkt om alle tiltak i området. Også arkitekt Alv Martin Vangdal, som er ansvarleg søkjar, sa at verksemda mellom anna har fått godkjent veg opp til tomtene det vert arbeidd med. Det er anleggsvegar som skal førast tilbake til stiar, meiner arkitekten.

Fristen for å utføra rettinga er 31. desember 2024. Om ikkje det vert gjort, kan verksemda venta seg førelegg, og at kommunen sjølv kan utføra arbeidet på føretaket si rekning. Pålegget er tinglyst som hefte på eigedomen.