– Må oppretta to råd eller eitt felles råd
Det er stor mangel på vilje til politisk oppfylging av saka om eit eige eldreråd i Kvam.
Det hevdar samarbeidsutvalet for pensjonistlaga i Kvam i eit straumbrev til Kvam herad og fleire politikarar. Brevet er skrive av leiar for utvalet, Annlaug Sponheim Vik.
Ordførar Torgeir Næss (Ap) er usamd. Han svarar at det ved sist val, så vidt han hugsar, ikkje lét seg gjera å få tak i nok folk til eit eige råd for menneske med nedsett funksjonsevne. Dette vart då slege saman med eldrerådet.
Det er eit krav i kommunelova om å ha råd som omfattar menneske med nedsett funksjonsevne. Det same gjeld råd for eldre. Dette skal takast opp ved starten på kvar valperiode.
Dersom det ikkje lèt seg gjera å etablera to separate råd, så er det forskriftsfesta at det «kan» opprettast eit fellesråd. Strengt teke skal det då opprettast eit fellesråd i og med at det er påkravd med råd for desse områda, meiner Næss. I så fall må råda fyrst høyrast og få høve til å uttala seg.
Det er, slik Næss tolkar forskrift om medverkingsordningar, ikkje lov for politikarane å oppretta eit råd for berre eitt av områda.
– Her har ikkje dei politiske partia noko vurderingsrom. Det er tilgang på kandidatar, ikkje politisk vilje, som avgjer, skriv Næss.
Det neste som skal skje på dette feltet, er heradsstyrevalet. Deretter skal den nye valnemnda finna folk til dei ulike råda og utvala.
Næss opplyser at administrasjonen denne gongen har vore føre var og allereie sendt ut førespurnader til lag og organisasjonar som soknar til RMNFE. Det er gjort for at valnemnda skal ha tilstrekkeleg med kandidatar, nettopp for at det kan opprettast separate råd.
– Eg håpar det lukkast, skriv Næss.
Om det lèt seg gjera å oppretta to separate råd, er ordføraren ganske sikker på at det nye heradsstyret vil gjera det. Slik han tolkar lova med forskrift, har heradsstyret då også plikt til det. Forskrifta seier at det må vera «nødvendig» ut frå lokale tilhøve.
– Det skal difor vera ein høg terskel for å halda fram med eitt fellesråd, skriv Næss.
Samarbeidsutvalet tok opp saka for ni månader sidan, og ho skulle ha vore avklara i god tid før valet, påpeikar utvalsleiar Vik. Reaksjonar frå tre av partia kom berre tre veker før valet. Dei andre partia hadde nyleg framleis ikkje svara, og det var bakgrunnen for ei femte melding frå utvalet om saka.
