Må laga meir plass til kraftline
Statnett har fått løyve til såkalla temperaturoppgradering av kraftlina mellom Mauranger og Samnanger. Det føreset tiltak ved Ljonesåsen.
Tiltaket inneber at ein luftleidning toler høgare temperatur og større straum, og er eit av fleire tiltak Statnett utfører for å gjera eldre leidningar meir kostnadseffektive. Ifylgje systemutviklingsplanen frå 2023 skal nær 100 leidningar temperaturoppgraderast dei neste 15 åra.
Ein av desse ligg altså i Hardanger og går gjennom Jondal og Kvam. Leidningen er fem mil lang. Noregs vassdrags- og energidirektorat godkjende i juni detaljplanen for oppgraderinga, som vil innebera at linene vil henga nærare bakken. Kostnaden er stipulert til 1,5 millionar kroner.
Når temperaturen aukar, utvidar linene seg. Dimed vil dei koma nærare bakken når belastinga er stor. Ved to kortare spenn vil Statnett difor fjerna lausmassar under leidningen for å ha stor nok avstand mellom bakken og leidningen.
Det eine spennet ligg i Kvinnherad og det andre i Kvam. Sistnemnde ligg nærare bestemt på gard nummer 95/18 nær Ljonesåsen, der det går veg heilt fram frå før. Overskotsmassane skal lagrast ved sida av leidningstraseen. Også pigging og sprenging kan verta aktuelt.
Tiltaka skal auka driftstemperaturen frå 80 til 100 grader, noko som aukar overføringskapasiteten med fem prosent.
Kvam herad hadde ikkje merknader til søknaden då tiltaket var på høyring. NVE meiner tiltaka er så små at dei ikkje har vesentlege verknader for ålmenne eller private interesser.
