— Må krevja talfesta utslepp
Avføring og avfall bør ikkje få spreia seg over eit nytt og større område ved Tveitnes.
Det skriv Naturvernforbundet i Kvam til Kvam herad i ein uttale til søknaden frå Lingalaks AS om flytting av oppdrettsanlegget mot sørvest.
Lingalaks har drive med oppdrett i området sidan 2010. Det er nyleg søkt om større merdar og flytting lenger ut i fjorden for å «optimalisera drifta med omsyn til miljøtilhøve». I søknaden vert det opplyst at utsleppa frå anlegget har samla seg i eit søkk og at ein vil flytta merdane til eit område med betre botntopografi.
Dette vert støtta av dei årlege miljøundersøkingane, der Tveitnes i fleire enn halvparten av undersøkingane er karakterisert som i dårleg stand frå 2010 til 2018. Det går fram av ei konsekvensutgreiing frå ABO Plan & Arkitektur AS i samband med kommuneplanvedtaket i 2019.
I flyttesøknaden vert det ikkje nemnt noko om kva utsleppet i ti år har hatt å seia for dyrelivet i det området som er øydelagt, påpeikar forbundet.
Utsleppa spreier seg ut minst 1—1, 5 kilometer frå anlegget. Det vert lite opplyst, men det er god grunn til å tru at det her er viktige gyteområde for mellom anna raudlistearten blålange, pluss kveite, hevdar forbundet.
Korallskogane som ifylgje fråsegna truleg finst i området, kan verta øydelagde av slam. Slike område er viktige for at fiskeyngel og småfisk får ein trygg oppvekst.
— Både me som vil ta vare på fjorden vår og styresmaktene må forlanga at han som ureinar, i dette tilfellet oppdrettaren, søkjer om eit talfesta utsleppsløyve for ureininga, skriv Soldal.
Når eit anlegg vert flytta, må det også setjast krav om opprydding, krev forbundet.
Maksimalt tillaten biomasse (MTB) på Tveitnes er 2.340 tonn.
