Må i fengsel etter seksuell kontakt med unge jenter
Mannen sende bilete og videoar med seksuelt innhald til unge jenter, og prøvde å få det same i retur. No er han dømd.
Ein mann busett i Kvam er dømd for å ha lokka born under 16 år til å visa seksuelt krenkjande eller anna uanstendig åtferd.
Mannen har over ein periode på tre og eit halvt år hatt kontakt med mindreårige jenter på internett og opptredd seksuelt krenkjande. Saka vart avdekt i samband med opprulling av ei anna sak der ein av dei fornærma var involvert.
No er han dømd til fengsel i eitt år og seks månader for ugjerningane.
Domen er ikkje rettskraftig.
Retten i tvil
Då mannen møtte i Hordaland tingrett i mai, sa han seg delvis skuldig i tiltalen.
Tre ulike Snapchat-brukarar var omtala i tiltaleavgjerda, men etterforskinga har berre klart å identifisera éin av dei. Den dømde og den fornærma kjende ikkje kvarandre frå før.
I retten forklarte mannen at han vart lagt til på Snapchat av den fornærma, og etter kvart vart kontakten mellom dei to meir seksualisert. Graden av kontakt har variert.
Retten var i tvil om to telefonsamtalar hadde funne stad før eller etter at fornærma fylte 14 år. Mannen var tiltala for å ha prøvd å få eit barn under 14 år til å utføra handlingar som svarar til seksuell omgang med seg sjølv, men det er ikkje bevist. Partane var ueinige om når samtalane fann stad. Retten fann det likevel bevist ut over rimeleg og fornuftig tvil at den dømde var klar over eller heldt det som høgst sannsynleg at fornærma var under 16 år. Tiltaleposten vart difor endra til forsøk på seksuell omgang med born mellom 14 og 16 år.
– Hadde det vanskeleg
Retten har lagt vekt på at kontakten mellom partane har vore langvarig og i periodar intensiv, og at det er sendt ei stor mengd bilete og videoar til fornærma. Det vart òg framheva at mannen fekk jenta til å tru at ho snakka med ein ung mann på kring 20 år, og såleis vann tillit hjå henne.
I formildande retning peikar retten på at mannen i hovudsak har erkjent straffskuld. Retten merka seg at det var den tiltala som opplyste om ein av Snapchat-brukarane. Han har understreka at han ikkje var særskilt oppteken av å koma i kontakt med born, men han har likevel ikkje gjort noko for å unngå det, ifylgje domen.
Mannen forklara at han hadde det vanskeleg i den aktuelle tida, og at kontakten med fornærma var eit forsøk på flukt frå det verkelege livet.
Ifylgje domen er den fornærma prega av kontakten ho har hatt med mannen. Han er dømd til å betala henne 60.000 kroner i oppreisning. Han må også betala 8.000 kroner i sakskostnader til staten.
