– Må ha rom for nye tilbod
Kvam vidaregåande skule håpar det vert råd å utvikla ny fagtilbod ved Kvam vidaregåande skule dersom det lokale næringslivet treng kompetansen.
Det går fram av høyringsinnspelet frå skulen til den heilskaplege planen for tilbodsstruktur i vidaregåande skule i Vestland fylkeskommune i perioden 2025–2035. Skulen er nøgd med dei skisserte fagtilboda i planutkastet.
Skulen tek til orde for stabilitet i opplæringstilbodet, men meiner det må vera rom for å organisera på nye måtar utan at søkbare tilbod vert fjerna.
– På generelt grunnlag meiner me at det bør vera rom for halve klassar for å oppretthalda fagtilbod i distrikta, skriv rektor Arild Matland og dei tillitsvalde Oddbjørn Berge og Tormod Lunestad.
Dei påpeikar at den nye skulen i Norheimsund vil gje elevar utanfor Kvam kortare veg til skulen. Det tilseier at det kan verta grunnlag for breiare tilbod enn planutkastet tilseier, og difor må tilbodet justerast jamleg, krev dei.
Då planen var på høyring i vår, kom over 700 innspel inn. Så mange kom at fylkeskommunen fekk Norconsult AS til å gå gjennom dei for seg. Berre to av innspela kom frå Kvam – det eine det ovanfor omtala frå skulen og det andre frå Kvam herad.
Flest innspel – 267 – handlar om strukturen i Nordfjord. 149 gjeld Hardanger og Voss. 296 av innspela kom frå privatpersonar. Flest innspel kom om Firda vidaregåande skule (185) og Voss gymnas (123). 12 handla om Odda vidaregåande skule.
Planen skal handsamast politisk i fleire organ frå 28. august, med vedtak i fylkestinget 1.–2. oktober, melder fylkeskommunen på eiga heimeside.
