Må fjerna båten
Etter ei synfaring er det inngått avtale om at båten som står på eit jorde ved fylkesveg 576 på Linga, skal vera vekke innan 1. desember.
Det går fram av ein rapport etter ei synfaring Bir Husholdning AS utførte 25. september. Bakgrunnen for synfaringa var ei innmeld sak om mogleg forsøpling på ein eigedom. Under synfaringa møtte far og onkel til grunneigaren. Det er skrive protokoll etter møtet. Her vert det opplyst at båten har stått ved hovudvegen i om lag 25 år. Det var mange lag presenning rundt båten. Desse er med tida øydelagde av vinden.
I rapporten står det at presenningen som var surra rundt båten, er fjerna, og at båten skal fjernast. Arbeidet med å fjerna båten er òg i gang. Det går fram av rapporten at båtdelane skal sorterast i konteinarar og leverast til godkjent mottak.
