Må finna nye styrerepresentantar

Det ligg an til utskiftingar i både Hardanger AKS AS, Kvammabadet KF og Kvam Kraftverk AS i vår.

Vala vart lausleg drøfta av valnemnda i Kvam herad tysdag. Styra er oppmoda om å evaluera seg sjølv, som eit grunnlag for å finna nye styrelemer.

Hardanger AKS og Kvam Kraftverk har levert evalueringa, medan Kvammabadet ikkje er i mål enno ettersom føretaket har etterlyst informasjon frå Kvam herad. Denne skal no vera send, ifølgje varaordførar og leiar i valnemnda, Frode Nygård (Frp).

Vil blanda seg inn

Formelt sett har ikkje valnemnda noko med valet av styre for Hardanger AKS. Ordføraren gjev innstilling på vegner av Kvam herad. Ifølgje Nygård er det eit ynske om at ordføraren får hjelp til å finna gode kandidatar, gjennom at arbeidet vert formalisert gjennom ei eiga sak i valnemnda.

Ifølgje Nygård skal ordførar Torgeir Næss (Ap) spørja dei andre eigarane om framgangsmåten er akseptabel, slik at ein ikkje risikerer å trakka nokon på tærne.

– Dette er eit viktig styre, spesielt for Kvam herad, sa Nygård.

Han opplyste at styreleiar Nils Frode Skaar ynskjer avløysing, men kan halda fram eitt år til dersom det er naudsynt.

I eit brev til heradsstyret i vinter tok dagleg leiar Øyvind Aksnes fleire store utfordringar i verksemda. Ottar Randa (H) spådde at det kan verta vanskeleg å finna ein ny med tanke på det som har kome fram om verksemda dei siste månadene. Han meiner prosessen bør vera grundig og at ein bør kartleggja kompetansebehovet godt.

Nygård minte om at verksemda har fått relativt god kontroll på økonomien. Jostein Ljones (Sp) meiner det er rett å gje valnemnda ei aktiv rolle i samband med valet, og påpeika at dei andre eigarane er temmeleg passive.

Nygård opplyste at det ser ut til å verta ein del utskifting i styret i Kvammabadet.

Fleire på val

I Kvam Kraftverk står nestleiar Ingrid Heradstveit Guddal på val, og ho stiller ikkje til attval. Også styrelem Vidar Riber og varalem Anne Marie Øvrevik står på val, men dei er villige til å lata seg velja igjen.

Styreleiar Gunnar Skeie skriv i evalueringa at det kan verta vanskeleg å erstatta kompetansen til Guddal. Han meiner erstattaren bør ha formell økonomisk utdanning og bakgrunn. Skeie meiner både Riber og Øvrevik bør få halda fram.

Andre val

Valnemnda tilrådde at Kari Torpe (Sp), Jostein Moldsvor (KrF) og Geir Madsen (SV) får plass i panelet som skal vurdera kvaliteten på maten som brukarar i helse og omsorg får servert.

Dag Rune Mo vart tilrådd som eigarstyremedlem i Hardanger folkemuseum, med Gry M. Kyrkjeeide som varamedlem. Også val til to fond og eitt legat vart drøfta. Desse sakene avgjer heradsstyret i eit digitalt møte onsdag.

Utvalet kom ikkje i mål med å finna fem heradsstyrelemer til utvalet som skal vurdera dei etiske retningslinene for folkevalde. Saka vert difor drøfta i eit nytt møte i nemnda rett før heradsstyremøtet.