– Må finna løysingar som ikkje stengjer samband
Ei rekkje innstillingar på ferjesambandet mellom Jondal og Tørvikbygd fekk Hardangerrådet til å vakna.
Ordførarane i Hardanger vart fredag samde om å protestera mot dei hyppige kanselleringane av avgangar på det viktige ferjesambandet denne veka.
I eit brev til politisk og administrativ leiing på samferdslefeltet i fylkeskommunen viser rådet til at mannskapsmangel ser ut til å liggja bak innstillingane.
Fjord1 AS har opplyst til HF at sjukdom løynde seg bak formuleringa «operasjonelle årsaker», som vart nytta i kunngjeringane av dei innstilte avgangane, denne veka.
Regionrådet oppmodar fylkeskommunen og reiarlaget om å finna løysingar som sikrar at mannskapsmangel ikkje fører til at sambandet vert stengt.
– Dette vil bli viktigare og viktigare i åra som kjem, då det er sannsynleg at tilgangen på kvalifisert arbeidskraft blir dårlegare, heiter det i klagesongen.
I nye kontraktar må risikoen for slik stenging vera lågast mogeleg, til dømes gjennom krav om at det finst ein plan B på kvart samband. Om dette skulle vera umogeleg på tvers av operatørar, må kanskje fleire samband vera med i eitt anbod. Til dømes kan alle samband frå og med Kvinnherad til den indre delen av Hardanger vera eitt slikt sambandsområde, skisserer ordførarane.
Dei viser til at jondalsferja er både pendlarferje og ligg på ein hovudveg mellom aust og vest. Trøysta i form av ein passasjerbåt stettar berre delvis lokale behov, medan trafikantar mellom aust og vest må oppsøkja andre samband via kanskje smale og ueigna vegar, ifylgje ordførarane.
