– Må få på plass prosedyrar for å hindra kaos

I mai og juni har det ved to høve oppstått kaos på fylkesveg 79 mellom Norheimsund og Granvin. Årsaka var stenging av europaveg 16 mellom Bergen og Voss. Ved det fyrste høvet, fredag før pinse, førte asfalteringsarbeid ved Børvenestunnelen til ekstra kaos.

Grendeutvalet har teke tak i saka. I eit brev oppmodar utvalet fylkeskommunen om å få på plass ei ordning og prosedyrar for slike situasjonar. Vegarbeid må stoppast straks, og trafikkdirigentane må lærast opp til å takla situasjonane. Utvalet framhevar særleg at utrykkingskøyretøy ikkje vil koma seg fram dersom trafikken står i stampe.

I eit brev til ordføraren i Kvam påpeikar utvalet at heller ikkje folk i Øystese alltid kan reisa raskt til sjukehus i Bergen dersom trafikken, ettersom køen kan stå i Børvenestunnelen og på Stronde. Det var tilfellet nyleg, skriv utvalet.

– Ein må òg tenkja på at det er Voss som er sjukehuset vårt, og det er dit legane har pålegg om å senda oss i fyrste omgang, skriv leiar Kristi Opsanger.

Ho meiner trafikkdirigentar på ulike stader langs omkøyringsvegen må på plass, og at naudetatane må få varsel straks vegen i Hardanger vert nytta som omkøyringsveg.

– Dette hastar, for at vegen må nyttast til omkøyring, må me leve med i mange år framover! skriv Opsanger.