– Må bak lås og slå
Ein mann busett i Bergen vart i fjor haust tiltala for å ha narra til seg ein gassgrill og ei gassflaske i ein butikk i Norheimsund. No er han dømd.
Det kjem fram i ein dom frå Gulating lagmannsrett. Mannen skal ha lova å gjera opp for seg via ein firmakonto, men betala ikkje.
Saka vart handsama i Hordaland tingrett i desember. Tingretten dømde mannen til fengsel i 45 dagar for ugjerninga. Han vart òg dømd til å betala 5.000 kroner i sakskostnader.
Domen vart anka, og ei ny rettssak gjekk føre seg i Gulating lagmannsrett i juni. Mannen meiner det ikkje er snakk om eit bedrageri, då han meinte å betala, men det ikkje gjekk i orden slik han hadde avtala med butikken.
Lagmannsretten festar ikkje lit til forklaringa. Mannen kom stadig med nye forklaringar på kvifor varene ikkje vart betalte, står det i domen.
Mannen er dømd for liknande lovbrot fleire gongar før. Lagmannsretten påpeikar i domen at bedrageriet galdt varer med avgrensa verdi, men at det likevel er naudsynt å gje ein følbar reaksjon, særleg med omsyn til tidlegare vandel.
Gulating lagmannsrett landa på same straff som tingretten.
