Lyttebøyer skal kartleggje nisene i Hardangerfjorden

Forskarar ved Havforskingsinstituttet har plassert lyttebøyer for å følge med på nisene i Hardangerfjorden. Der er det fleire niser enn i andre norske fjordar.

– Desse bøyene lyttar etter den same frekvensen som nisene brukar når dei ekkolokaliserer. Til liks med flaggermus, sender niser ut ein høgfrekvent lyd og brukar ekkoet til å sjå i miljøet rundt seg, seier havforskar Arne Bjørge ved Havforskingsinstituttet på nettsidene deira.

Prinsippet er det same som når fiskarar brukar ekkolodd. Lyttebøyene vart plasserte ut i fjor haust, og forskarane skal følge nisene i eit heit år. Målet er å finne ut om nisene er i fjorden heile året, eller om det er ut- og innvandring med årstidene. Forskarane ønsker òg å finne ut når på døgnet nisene et, og dermed kanskje òg kva dei et.

Om nisene et på dagtid, er det sannsynleg at dei et fisk som står høgt i vatnet, som til dømes brisling. Men om dei et om natta, kan dei ta mesopelagiske artar som står djupt om dagen, men som vandrar opp om natta. Tidlegare har forskarar ved HI funne vassild, straumsild og laksesild i magen til niser frå Vestlandet.

HI får òg hjelp av elevar ved Hardanger produksjonsskule, til å passe på vedlikehald av bøyene. Skulen har eit tilbud for ungdom som droppar ut av vanlig skolegang.