– Lyt truleg venta på natursnø

– Me har ikkje heilt bestemt oss for kva me skal gjera og korleis me skal halda ope, men det kan fort verta endringar samanlikna med tidlegare, seier Jan Guttorm Skeie, dagleg leiar i Furedalen Alpin.

Allereie i fjor hadde straumprisane auka betrakteleg samanlikna med tidlegare år. Då hadde skisenteret ein avtale om fastpris. No er straumprisane endå høgare, og avtalen gjeld ikkje lenger. Det fører til at verksemda lyt betala marknadsprisen.

– Går ikkje an

– Korleis er situasjonen hjå dykk?

– Ikkje bra. Me lyt gjera dei tiltaka me kan, seier Skeie.

I tida framover skal verksemda jobba med å finna nokon som kan og vil garantera kostnadane med straumbruken.

Med dagens prisar vil det kosta ein plass mellom 200.000 og 300.000 kroner i døgeret å produsera kunstsnø.

– Det seier seg sjølv at det ikkje går an, seier Skeie.

Planen er uansett at alt av feriar og helgar skal køyrast som normalt, opplyser han.

– Mot normalt

Eikedalen Skisenter AS meiner verksemda har rimeleg god kontroll på straumsituasjonen. Skisenteret siktar mot ein vinter med tilnærma normal drift, og brukar dagane til å førebu seg på vanleg vis.

– Me har fått ein avtale som sikrar oss brukbart frå januar av, seier dagleg leiar Fredrik Tønjum.

Det einaste som eventuelt avvik frå normal førebuing, er produksjonen av kunstsnø. Produksjonen av kunstsnø, som ofte går føre seg i desember, kanskje lyt venta til januar.

– Me ynskjer framleis å gjera det i desember, men me lyt sjå det an, seier Tønjum.

Vidare fortel Tønjum at skisenteret må spara på straumen, men at det ikkje skal gå ut over publikum. Sparetiltak vert sette i verk internt.

Skisenteret har også sett på ulike tiltak med å byta ut lysløp og heisstyringar, til dømes, men det får ein ikkje gjort til vinteren uansett. Det vil ta tid å gjennomføra, og det er lang ventetid på delar, opplyser Tønjum.

– Belastande

Skisenteret på Folgefonna kunne tidlegare i år melda om gode tider og ein bra sesong. Likevel er straumsituasjonen openbert belastande når prisane er som dei er, opplyser dagleg leiar i FONNA Glacier Ski Resort, Stig Otto Mjelde.

Skisenteret har gjennomført tiltak for å få ned straumbruken, ved mellom anna å senka temperaturen to grader i snitt på senteret og til dels lågare på varmare dagar.

– Me hamnar i den store massen av selskap som kan søkja om straumstønad, men kva dette til slutt utgjer, veit ein ikkje. Me ventar ei avkorting, då truleg langt fleire verksemder enn stipulert vil søkja stønad, seier Mjelde.