Lyser opp lakselus med ny metode

Forskarar ved Havforskingsinstituttet har i samarbeid med kollegaer frå Færøyene og Skottland kanskje funne ein metode som vil gjere det mykje lettare å telje lakseluslarvar.

Den nye metoden går ut på at ein brukar såkalla fluorescerande lys. Det er ein type lys som blir sendt ut av fluorescerande materialar når dei blir treft av ultrafiolett lys. Denne metoden blir blant anna brukt til å merke pass og pengar.

– Ved å bruke fluorescens, klarer vi å sjå noko vi ikkje klarer å sjå med vanleg lys, forklarer stipendiat Cameron Thompson, som arbeider med dette i doktorgrada si, i ei sak på nettsidene til Havforskingsinstituttet.

For å kunne bruke denne metoden til å gjere lakseluslarvar lettare å sjå, måtte forskarane først finne ut kva lysbølgjelengd som ville gjere larvane meir synlege. Dei søkte systematisk over eit spekter av bølgjelengder, og fann unike «fluorescens-fingeravtrykk» for luselarver.

– Vi ser at lakseluslarvar har eit unikt fingeravtrykk som skil seg frå skottelus og andre planktonorganismar. Det er ganske kult, seier stipendiat Thompson.

– I dag tar det lang tid å gå gjennom prøver for å finne lakseluslarvar. Med den nye metoden kan vi analysere langt fleire prøver. Det går raskare og det er mykje enklare å få auge på larvane, så resultata vil bli betre og meir konsistente, seier forskar Rasmus Skern-Mauritzen i saka.