Lyser opp jula for vanskelegstilte
Lions Club Norheimsund har i mange år pakka julekassar som vert delte ut til trengande. I år var behovet uvanleg stort.
16 hender var i sving med å pakka kassane med ymse julegodt då HF var innom gamleskulen på Norheim onsdag. Suppe, sjokolade, ris, kaffi og ymse anna ventar mottakarane av kassane, fortel Gunnar Eiken, som er leiar for sosialkomiteen i den lokale Lions-klubben.
– Det er både mettande og til å kosa seg med, seier president Tore Fykse.
Duoen er usikker på når klubben byrja pakka julekassar, men meiner det må vera minst ti år sidan. Kassane vert henta av barnevernet og avdeling for rus og psykisk helse i Kvam herad, som fordeler dei på både einslege og familiar. Lions veit såleis ingenting om kven som får dei.
– I år pakkar me 65 kassar, og i fjor var det 50, så det tyder på ein auke i behovet, seier Eiken.
– Er det tilfeldig?
– Det er vanskeleg å seia, men om ein mistar jobben, har ein eit problem. Om ektefellen i tillegg mistar jobben, har ein endå større problem, seier Eiken.
Rema 1000 leverer varene, og i år har butikken i tillegg samla dei i butikken for Lions. Kostnaden er om lag 500 kroner per kasse, totalt om lag 33.000 kroner i år. Klubben betalar alt sjølv. Inntektene kjem i hovudsak frå betaling for Lions-katalogen og frå sal av kalendrar.
Pakkejobben tok om lag ein arbeidsdag for dei åtte frivillige Lions-medlemene. Medlemene var iførte munnbind, vaska og desinfiserte hendene og heldt minst to meters avstand, alt etter råd frå den lokale smittevernstyresmakta.
– Me gjer så godt me kan, seier Fykse.
Lions vart stifta i 1917, medan klubben i Norheimsund, som har 29 medlemer, hadde 50-årsjubileum for nokre år sidan. Kvam har i tillegg ein klubb i Strandebarm.
Aukande over tid
Leiar for avdeling for rus og psykisk helse i Kvam herad, Anne Merete Flekstad Vik, seier at hjelpebehovet har auka over tid. I år var Lions-klubben villig til å laga til fleire pakkar. Ho synest det er kjekt at medlemene gjer innsatsen fast og har forventingar og glede knytt til jobben.
– Det har vore stor gjevarglede generelt i år, seier Vik.
Kvam herad har formidla veldig mange donasjonar frå Betre kår – Kvam, som Ingrid Laupsa Tjosaas og Laila Skogesal Ditmarsen står bak, og frå fleire private verksemder.
– Omtanken betyr ekstra mykje i annleisåret, når kontakten med nettverket er redusert, seier Vik.
Ho seier at Kvam herad set stor pris på den frivillige innsatsen.
