Lysbakken attvald
Partileiar Audun Lysbakken vart sundag 14. februar attvald som fyrstekandidat til Stortinget for Hordaland SV.
Fagforeiningsleiar Sara Bell er nominert på andreplass.
— Eg er stolt over å få toppa SV-lista i heimfylket mitt, og gler meg til valkamp for miljø og rettferd. Eit meir rettvist Noreg og eit meir rettvist grønt skifte er dei viktigaste måla til SV, seier partileiaren i eit presseskriv.
— Vårt klare mål ved dette valet er to SV-mandat frå Hordaland, og målingane viser at det er innanfor rekkjevidd. Med Sara Bell vil arbeidsfolk og fagrørsla få ei sterk stemme på Stortinget, seier Lysbakken.
Bell seier at bemanningsbransjen skal avviklast.
— Eg lovar å bruka dei neste fire åra på å sparka bemanningsbransjen ut av det norske arbeidslivet. Det er ei rekkje bransjar som har gjort seg avhengige av billeg, innleigd arbeidskraft. Det må dei få hjelp til å venja seg av med, seier andrekandidaten.
— Eg vil understreka at eg ynskjer utanlandsk arbeidskraft velkomen i det norske arbeidslivet på like vilkår som fast tilsette. Det er arbeidsgjevarane som må regulerast, ikkje arbeidarane, seier Bell.
Mari Svartveit Hansen (36) frå Ullensvang er nominert på 8.-plass på SV-lista. Guro Ljone frå Ulvik står på 12.-plass.
