Lysare hotelltider: — Endeleg!

Frukosten er overstått. Servitørar ryddar av borda. På kjøkenet er oppvasken i full sving og førebuingane til neste måltid i gang. Tanja Borge tek seg tid til eit kjapt intervju med HF.

«Nye» Hardangerfjord Hotel i Øystese fekk ein mildt sagt tøff start på livet. Halvanna veke etter opninga i fjor vinter måtte hotellet stengja. Sidan har det vore av og på med ymse tiltak, men aldri har drifta vore restriksjonslaus.

Likevel har det gått forbløffande godt, slår Borge fast. Hotellet har overlevd og hatt lite gjennomtrekk i den faste staben. Kvemmingane er flinke til å nytta tilbodet. Og fredag kan livet verta endå lettare, for då kjem siste nytt om «gjenopninga» av landet. Borge kryssar fingrane for at «meteren» forsvinn. På den andre sida gjorde ho det same sist det var kalla inn til ein liknande pressekonferanse — utan at det kom tiltak til glede for hotellet.

Viktig for økonomien er tiltaka utvilsamt. I dag kan restauranten hysa 90—100 gjester, mot normalt 220—230. I tillegg har forbodet mot servering over disk vore ein brems.

Poteter i staben

Bransjen har hatt bemanningsutfordringar på grunn av mangel på utanlandsk arbeidskraft, og heller ikkje hotellet i Øystese har gått klar. Særleg mangel på norske kokkar merkast, men situasjonen har vore verre særleg på Fjordtind-hotellet i Ulvik og dels i Eidfjord, fortel Borge. Til skilnad for dei legg hotellet i Kvam opp til heilårsdrift, noko som gjer rekrutteringa enklare. Det er nær umogeleg å rekruttera nordmenn til sesongbaserte stillingar, fortel ho.

— Ein skulle alltid hatt ein eller to kokkar til, men me har fått det til å gå rundt. Me har vore heldige og klara å halda på folk, og me har fått inn mange unge, lokale servitørar som leverer. Det er ei frygd å fylgja utviklinga deira sidan mai; dei har vorte profesjonelle og veldig flinke, seier ho.

Borge skryter av at ho har ein fleksibel stab som er villig til å ta på seg mange ulike oppgåver for å få hjula til å gå rundt.

Må avvisa ein del

I fellesferien hadde hotellet mange gjester og ei travel tid. August var betre enn i fjor, men september er endå betre, fortel Borge.

Borge seier kurs- og konferansemarknaden tek seg kraftig opp, og at det er godt med gjester særleg i helgane. Denne veka har møteromma vore smekkfulle — vel å merka fråtrekt restriksjonar. Borge har litt dårleg samvit av at kapasiteten har vore så liten at mange kvemmingar som har ynskt å eta, har vorte avviste sidan dei overnattande gjestene går fyrst i køen.

Borge har fått inntrykk av at ordet går. Folk som har vore på hotellet med familien i sommar, spreier ryktet om mat, sørvis og lokale. Ein pluss er den korte vegen til Bergen.

— Og så bur me midt i Noregs beste spiskammers, seier ho.

Dagen før vart fleire hjortar, rett nok importerte frå Sogn, parterte på kjøkenet, ein aktivitet som lokka fleire gjester som nyfike publikum. Hjorten er no komen på haustmenyen.

Snart er det haustferie, med det han fører med seg av ekstra trafikk, og i tillegg kjem Siderfestivalen 8.—10. oktober. Sidermiddagen i konferansesalen er allereie utseld. Fredagen vert det siderdrinkkonkurranse med eigen jury, med mål om å gje Hardangerdraum selskap på barmenyen i form av vinnaren.

Tre helgar i november og desember er sette av til julebord. To av laurdagane er fullteikna, men med restriksjonslette fredag kan fleire få plass, opplyser Borge.