Lys på Strandvegen er fullfinansiert
Med løyvinga i det kommunale budsjettet er det duka for lyssette spaserturar på sentrumsvegen i Norheimsund.
Bidrag til finansieringa kjem frå kraftfondet i Kvam herad, Sparebankstiftinga Hardanger, eldsjelfondet til Sparebanken Vest, Norsk Tipping, Thon Hotel Sandven, grunneigarane og Norheimsund Grendautval. I tillegg løyvde fleirtalet i heradsstyret ein halv million kroner til prosjektet i møtet 8. desember.
– Eg trur finansieringa er på plass, seier leiar i grendeutvalet, Bjørgulv Hauger.
Norheimsund Grendautval har tilrettelagt prosjektet og arbeidd med finansiering. Teknisk eining i Kvam herad er byggherre og står for avtale med entreprenør.
Leiar i rådet for menneske med nedsett funksjonsevne og eldre, Svein Petter Bårdsgjære, skreiv i eit straumbrev til Kvam herad i haust at lysa bør koma opp før vinteren set inn med mørke og is. Bårdsgjære oppmodar heradet om å ta tak i saka og ikkje leggja henne i ein skuff.
