Løyner fire av seks namn
Då Ullensvang kommune offentleggjorde søkjarane til stillinga som leiar for renovasjon, lèt kommunen fire av seks vera anonyme.
Berre Astrid Nygaard Alfredsen og Karam Alkhaled står fram med namn. HF bad i juni om innsyn i den fullstendige søkjarlista, og klaga på vedtaket om å løyna dei andre namna.
I rettleiaren til offentleglova står det mellom anna at ei generell misnøye med at søknaden vert kjend ikkje er tilstrekkeleg grunn til ikkje å publisera namn. Det må liggja føre særskilde omstende og påvisast at innsyn vil kunna føra til meir konkrete skadar eller ulemper.
Ullensvang kommune har handsama klagen og konkludert med at HF ikkje har rett på innsyn. I grunngjevinga til dei fire som ikkje er offentleggjorde, skriv søkjarane mellom anna om omstruktureringar på noverande arbeidsplass, og om arbeidsplassar som kan vert påverka av di dei har leiarstillingar. Éin søkjar nemner at hen er tilsett hjå ein samarbeidspartnar av renovasjonen i kommunen.
