Lokka med kortreist i Norheimsund
Nokre lokalmatprodusentar tek grep for å nå fleire kundar. No vert det marknad i Norheimsund ein gong i månaden.
Den første marknaden var torsdag 14. mars. At torget i Norheimsund plutseleg var fullt av salsbuer, kom som ei overrasking på Beate Gauden.
– Eg gjekk tilfeldigvis forbi og var ikkje klar over at det var marknad i dag. Dette er kjempebra. Veldig positivt. Me treng lokalmat, og det er viktig å støtta det lokale næringslivet, seier ho.
Gauden sette straks kursen mot bua til Hardanger Bygdeysteri AS for å hamstra Steikjeost til eit slunke kjøleskap.
– Eg må alltid ha litt Steikjeost i kjøleskapet, fortel ho.
– Me tek sjansen
I ysteribua tok dagleg leiar Marit Buttingsrud seg av salet. Ysteriet var ein av åtte lokalmatprodusentar som samla seg i Skummesalen i Øystese 21. februar. Målet var å drøfta korleis ein kan utvikla konseptet til Bondens Marked i Kvam.
– Tidlegare har det vore marknad to, tre, kanskje fire gonger i året. Me drøfta om me skulle ha marknad oftare, og vart samde om å gje det ein sjanse, fortel Buttingsrud.
Planen er å arrangera marknad den fjerde torsdagen i kvar månad.
Det er ein grunn til at ein har valt torsdagar.
– Me har så mykje anna å gjera i helgane. Torsdagar gjer at me mistar hyttefolket på Kvamskogen, men denne marknaden rettar seg først og framst mot dei som bur i Kvam, seier Buttingsrud.
Gauden tykkjer grepet er godt.
– I helgane vil eg på hytta, på fjelltur eller til Bergen. Eg vil ikkje gå rundt i Grova, seier ho.
– Treng opplæring
Ifølgje Buttingsrud er marknadene rimelege å arrangera.
– Arbeidet gjer me på dugnad, og plassen låner me gratis frå heradet. Personleg tykkjer eg det er godt med ein marknad så nær heimen. Då slepp eg å bruka ein heil dag på arrangementet, seier ho.
Ho merka seg at marknaden kom overraskande på Gauden.
– Sjølv om me har annonsert både i HF og i sosiale medium, har ikkje folk fått det med seg. Det kan fort ta eit år å læra kvemmingane opp til at det er månadlege marknader i Norheimsund. Difor er planen å ha marknad ein gong i månaden det neste året. Eg håpar interessa vert så stor at marknaden er komen for å bli, seier ho.
– Kva vert nøkkelen til suksess?
– Nøkkelen er at kundane kjem. Me kan ikkje stå her dersom ingen handlar. For at folk skal koma, må me vera flinke til å gje dei ei god oppleving.
Ti seljarar hadde møtt opp på den første marknaden. Ein av dei var frå utanfor Kvam.
