– Lokal mat er i vinden
Bondens Marked er i eit prøveår for å finna ut om det er liv laga å arrangera han månadleg. No er satsinga justert litt.
Ein torsdag i månaden samlast lokale produsentar i Grova for å selja produkta sine. Dei fleste kjem frå Kvam, men nokre reiser lenger for å visa seg fram. Kven som er representert på marknaden, varierer frå gong til gong.
Ifylgje Tone Søndmør, som driv Kjøkkenhagen på Rykkje og deler det administrative ansvaret med Marit Buttingsrud, har oppslutninga vore god. Men det er ikkje alle det passar for kvar gong.
– Det er viktig at lokale produsentar får visa seg fram og treffa kundar. Lokal mat kjøpt rett frå produsentar og bønder er veldig i vinden. Folk vil vita kvar maten kjem frå og korleis han er produsert, seier Søndmør.
– Flinke å kle seg
Kundane kan handla ost, mjølk, kjøt, fisk, grønsaker og frukt. Mellom åtte og ti produsentar har delteke på kvar marknad. Det er nesten like mange som plar stilla i Bergen, ifylgje Buttingsrud. Ho skriv at marknaden er godt motteken i Kvam.
Marknaden er driven på dugnad, slik at kostnadane med å delta vert låge. Buttingsrud skriv at dette skil seg frå marknadar på større stader. Der må ein finansiera både plassleige og ein marknadsleiar. Ho trur og håpar at Bondens Marknad kan vidareførast i 2025..
– Me har diverre vore uheldige med vêret, men me er sikre på at det er potensial for å få naudsynt omsetning, skriv ho.
Søndmør seier at det merkast når vêret er dårleg. Då kjem færre for å handla.
– Heldigvis er vestlendingar vane med dårleg vêr. Mange er flinke til å kle seg og kjem likevel, seier ho.
– Stille på slutten
Frå mars til no har marknaden vore open klokka 14–17. Ifølgje Buttingsrud var tanken at folk skulle kunne svinga innom på heimvegen. Ho opplever at mange ikkje veit om marknaden, og tilfeldigvis kjem innom fordi dei ser buene med mat.
– Marknaden er ikkje innarbeidd endå. Me trur ikkje folk tek turen innom etter jobb. Då vel dei truleg andre butikkar, skriv Buttingsrud.
Frå og med torsdag sist veke er opningstida 12–15. Søndmør seier at opningstida vert flytta for å utnytta dagslyset betre.
– Det er ganske stille på slutten av marknaden. Framover vert det mørkare, så me prøver å endra tidspunktet, seier Søndmør.
Les også:
